Kıik mıgratsııasyna ekodýk salý tıimsiz - Indýstrııa mınıstrligi
Astanadan shyqqan kólikti Arqalyq, Torǵaı, Yrǵyz arqyly ótkizip, «Batys Eýropa – Batys Qytaı» jolyna shyǵaratyn Ortalyq – Batys dáliziniń kıik mıgratsııasyna keri áseri kóp tıip jatqany týraly paıym-pikirler jıi aıtylyp júr.
Keıbir sarapshylar tipti bul problema kıikterdi dástúrli soqpaqtan adastyryp, onyń zııany sharýalarǵa tıip jatqanyn aıtyp dabyl qaqan bolatyn.
Ekologııa jáne tabıǵı resýrstar mınıstrliginiń QazAqparat saýalyna joldaǵan jaýabynda ekologtardyń bul dabyly oryndy ekeni aıtylǵan.
«Ekobelsendilerdiń, jaıylymdar men egis alqaptaryna zııan keltirmeý úshin iri magıstralderdiń astynan nemese ústinen ekologııalyq soqpaqtardy salý usynysyn mınıstrlik qoldaıdy. Keleshekte iri magıstralderdiń astynan nemese ústinen ekologııalyq soqpaqtardy salý josparlaý QR Indýstrııa jáne ınfraqurylymdyq damý mınıstrliginiń quzyryna kiredi. Sonymen qatar mınıstrlik kıikter mekendeıtin arealdarda iri magıstralderde ekologııalyq soqpaqtardy salý týraly usynysyn QR Indýstrııa jáne ınfraqurylymdyq damý mınıstrligine engizgen bolatyn. Osylaısha QR Indýstrııa jáne ınfraqurylymdyq damý mınıstrliginiń aqparaty boıynsha «Ortalyq-Batys» dálizi boıynsha 17 ótkel qarastyrylǵan. Ol úshin qansha qarajat kerek ekeni týraly aqparat mınıstrlikte joq», - dep jazylǵan vedomstvo jaýabynda.
Mundaǵy 17 ótkeldiń sıpaty qandaı bolatynyn Indýstrııa jáne ınfraqurylymdyq damý mınıstrligindegi mamandardan naqtyladyq.
Atalǵan ótkelder kólik dáliziniń kıik soqpaqtaryn qıyp ótetin tustarynda qos qaptaldy jaıdaqtaý tásili arqyly jasalmaq.
Sondaı-aq, mınıstrlik mamandary jolasty jáne jolústi soqpaqtarǵa kıikterdiń attap baspaıtynyn aıtyp otyr.
«2018 jylǵy 2 aqpanda bıoalýandyqty saqtaý qaýymdastyǵy ókilderiniń qatysýymen ótken ǵylymı-tehnıkalyq keńestiń otyrysynda jabaıy janýarlarǵa arnalǵan ótkelderdi ornatý máselesi qaraldy. Otyrys qorytyndysy boıynsha tıisti eskertý belgileri men qorǵanys qorshaýlaryn ornata otyryp, jabaıy janýarlardyń kóshi-qony ýchaskelerinde jol qaptaldaryn jaıdaqtaý týraly sheshim qabyldanǵan. Sondaı-aq, 2019 jylǵy 25 qyrkúıektegi jumys toby otyrysynyń hattamasyna sáıkes kıikterdiń «Ortalyq-Batys» dálizi arqyly ótetin oryndarynda jol qaptaldaryn jaıdaqtaý týraly sheshim qabyldandy. Bul sheshim jol ústindegi ekodýktar men jol astyndaǵy ótkelderdi aqbókender paıdalanbaıtyndyǵyna baılanysty bolyp otyr. Óıtkeni olar ashyq, tegis landshafttarda meken etedi jáne bıik qurylymdardan da, týnnel keıpindegi ótkelderden de úrkedi. Osy aıtylǵandardyń negizinde qazirgi jaǵdaıda aqbókenderdiń kedergisiz kóshi-qony úshin ekodýkter salý tıimsiz. Óıtkeni jol ótpelerin salýǵa jumsalatyn shyǵyndardyń jabaıy janýarlarǵa tıgizer paıdasy bolmaıdy», - dep jazylǵan Indýstrııa jáne ınfraqurylymdyq damý mınıstrliginiń málimetinde.
Vedomstvo deregine súıensek, «Ortalyq-Batys» dáliziniń boıynan janýarlar ótýge arnalǵan 44 ótkel salý kózdelgen.
«Onyń ishinde 27 jolasty ótkeli bar. Sondaı-aq, 17 ýchaskede jol qaptaldaryn jaıdaqtaý kózdelgen. Ekodýktar qurylysy aýqymdy kapıtaldy qajet etetin bolǵandyqtan bul másele QR Ekologııa jáne tabıǵı resýrstar mınıstrligimen birlesip pysyqtalyp, zerttelýde», - dep jazylǵan mınıstrlik jaýabynda.