Kıik atqan brakoner ustaldy
16:10, 26 Maýsym 2023
ASTANA. QazAqparat – «Sapsan» jedel toby men «Ohotzooprom» ÓB» RMQK ınspektorlary kezekti reıd barysynda kıik atqan brakonerdi ustady, dep habarlaıdy QazAqparat.
«2023 jylǵy 23 maýsymda «Sapsan» jedel toby men «Ohotzooprom» ÓB» RMQK ınspektorlary kezekti reıd barysynda Qorǵaljyn qoryǵynyń aýmaǵyna irgeles Qyzylkól kóliniń janynan «Nıva» markaly avtokóligin toqtatty. Avtokólik júrgizýshisiniń Qaraǵandy oblysy Nura aýdanynyń turǵyny ekeni anyqtaldy. Kólikti tintý barysynda salonnan kıik ushasynyń bólikteri tabyldy», – dep jazylǵan Ekologııa jáne tabıǵı resýrstar mınıstrligi baspasóz qyzmetiniń habarlamasynda.
Oqıǵa ornyna birden Qorǵaljyn aýdany polıtsııa bóliminiń jedel-tergeý toby shaqyryldy. Atalǵan fakt SDTTBT-de tirkelip, tıisti is-sharalar júrgizilip jatyr.