Kıevtegi jóndeý jumystarynan keıin QR UQK Shekara qyzmeti avıatsııasynyń ushaǵynda aqaýlar anyqtaldy
«2013 jylǵy 13 mamyrda QR UQK Shekara qyzmeti avıatsııasynyń An-72 ushaǵy Kıevtegi № 410 zaýytyndaǵy josparly avıa jóndeýden keıin Kıev-Aqtaý-Almaty baǵdary boıynsha ushty. Kedendik rásimder men shekaralyq qadaǵalaýdan ótý úshin Aqtaý qalasynda josparly qoný aınalymy kezinde ekıpaj ushaqtaǵy gıdrojúıelerdiń birinde qysymnyń tómendegenin anyqtady. Áýe kemesin qondyrý shtattyq rejimde ótti. Osydan keıingi tekserý jumystary barysynda sol jaq qozǵaltqyshta gıdroqospanyń aǵýy anyqtaldy», - delingen taratylǵan málimette.
Atap aıtqanda, ushaq jóndeýden ótkennen keıin «Antonov» konstrýktorlyq bıýrosynyń» synaqshy ushqyshtary men QR UQK ShQ avıatsııasy ushqyshtary Kıevte test synaqtar ótkizgen kórinedi. Ol kezdegi 6 saǵattan astam ushý ýaqytynda ushaq jumysynda aqaýlar baıqalmaǵan.
Shekara qyzmeti ushaqqa jóndeý jumystaryn jasaǵan № 410 zaýyttyń kepildikti tobyna osy oqıǵa boıynsha habar berdi. Vedomstvo aqparatyna qaraǵanda, zaýyttyń kepil toby ushaqty bir aptanyń ishinde qaıta jóndeıtin bolady.