Kıevtegi elshiliktiń jertólesinde 40 adam otyr – Qazaqstannyń Ýkraınadaǵy elshisi

NUR-SULTAN. QazAqparat –Qazaqstannyń Ýkraınadaǵy elshisi Darhan Káletaev Kıev qalasyndaǵy bizdiń elshiliktiń jórtólesin 40 adamnyń panalap otyrǵanyn málim etti, dep habarlaıdy QazAqparat tilshisi.

«Kıevtegi elshiliktiń jertólesinde 40 adam otyr. Evakýatsııaǵa ótinishter saǵat saıyn ósýde. Kóbisi bári oıdaǵydaı bolady dep úmittengen bolýy kerek. Biz barlyǵyn oılastyrýdamyz, sheshimin izdeýdemiz jáne bárimen baılanystamyz. Sondyqtan azamattarymyzdy sál sabyr etýge shaqyramyz. Bizdiń maqsat – Ýkraınadaǵy qazaqstandyqtardyń qaýipsizdigin qamtamasyz ete otyryp, elden aman saý alyp shyǵý. Biz qoldan kelgenniń bárin jasaımyz», - dedi Darhan Káletaev.

Odan bólek, elshi syn saǵatta tegin kómektesip jatqan Ýkraınadaǵy konsýldarǵa alǵysyn bildirdi.

«Qazaqstandyq konsýldyqtar týraly jeke aıtqym keledi. Qurmetti konsýldar, Ýkraınanyń azamattary, olar tegin jumys istep jatyr. Mysaly, QR qurmetti konsýly Galına Maslıýk qazaqstandyqtar mingen Lvovtan Polshaǵa deıingi avtobýstyń qunyn óz qaltasynan tóledi. Bizdiń azamattardy evakýatsııalaýda kóptegen azamat eńbektenip jatyr. Olardyń deni volonterler. Biz qol ushyn sozyp jatqan azamattarǵa aqy tólemeımiz», - deıdi ol.

Sondaı-aq, Darhan Káletaev «Jasyl» dáliz» júıesiniń qalaı jumys isteıtinin túsindirip ótken edi.