Kıevte qyz balany qutqarǵan Ulttyq ulan serjanty jolda taǵy bir boıjetkenge kómektesken

NUR-SULTAN. QazAqparat - Kıev qalasyndaǵy áýejaıda qyz balany qutqaryp qalǵan Ulttyq ulan serjanty Alekseı Kýdıenkonyń jary Vera oqıǵanyń qalaı bolǵanyn aıtyp berdi, dep habarlaıdy QazAqparat tilshisi QR Ulttyq ulan qyzmetiniń bastyǵy Rýslan Jangýlınge silteme jasap.

«Biz Domınıkan respýblıkasyna demalýǵa barǵanbyz. Bizben birge ata-anasymen Zlata atty qyz bala birge ushty. Bar-joǵy 4 aılyq edi. Qaıtar jolda Kıevtegi áýejaıda tamaqtanýǵa otyrdyq. Qyz bala ata-anasymen kórshi ústelde otyrǵan. Keıin balasyn ustaǵan ananyń qaıda ketkenin bilmeı qaldyq. Bir ýaqytta «Qutqaryńdar» degen daýys estildi. Onyń kúıeýi sasqalaqtaǵannan júgirip keldi. Bárimiz oqıǵa bolǵan jedel jettik. Sóıtsek, qyz balanyń kózi qaraýytyp, ózi kógerip barady eken. Aınaldyryp, aýzynan úrlegenmen jaǵdaı ońalmady», - deıdi Vera.

Alekseıdiń zaıyby aıtyp ótkendeı, Alekseı osy ýaqytta qyz balany qolyna alyp, aýzyn keńirek ashyp, saýsaǵymen tamaǵynan basyp jibergen.

«Bári bir mezette bolǵan jaǵdaı edi. Jubaıym qalaı osyny tez jasaǵanyn ózi de baıqamaı qaldy. Osydan keıin qyz balanyń demi ashyldy. Dárigerler kelgennen keıin ony jansaqtaý bólimine alyp ketti. Balanyń jaǵdaıyn bilip otyrdyq. Ony qalalyq aýrýhanaǵa alyp ketken eken. Anasynyń aıtýynsha, balasynyń tamaǵyna birdeńe turyp qalǵan. Otbasy Almatydan edi. Almatyǵa bizben birge ushpaq bolǵan. Osydan keıin biz Otanymyzǵa ushyp kelgennen keıin anasy habarlasyp, balasynyń jaǵdaıy jaqsy ekenin aıtty. Zor alǵysyn bildirip jatyr», - deıdi Vera.

Ushaqpen ushyp kele jatqan kezde Alekseı Kýdıenko taǵy bir boıjetkenge kómektesipti. Ol týraly ushaqtaǵy jolaýshylardyń biri aıtyp berdi.

«Ushý ýaqyty óte uzaq boldy, 12 saǵat. Bir mezette bir boıjetken esinen tanyp qaldy. Bortserikter dáriger bar ma dep surady. Alaıda dáriger bolmaı shyqqandyqtan, Alekseı júgirip baryp, boıjetkenniń esin jınaýǵa kómektesken», - deıdi jolaýshylardyń biri.

Eske sala ketsek, Shymkent qalasynyń turǵyny Alekseı Kýdıenko Kıevtegi áýejaıda kishkentaı qyz balany ólimnen qutqaryp qalǵanyn buǵan deıin jazǵan bolatynbyz.

Keıin Kıev áýejaıynda kishkentaı balany qutqaryp qalǵan jigit QR Ulttyq ulanynyń serjanty bolyp shyqqany belgili boldy.

«Kýdıenko Alekseı Aleksandrovıch 2010-2017 jyldary Shymkent qalasyndaǵy 6506-áskerı bólimshede qyzmet etken. Ol materıaldyq-tehnıkalyq qamtamasyz etý rotasynyń avtomobıl vzvodynyń aǵa júrgizýshisi bolǵan. 2017 jyldyń tamyzynan beri Almaty qalasyndaǵy apparatýralardy jóndeý jáne baılanys óńirlik ortalyǵynyń mamany bolyp jumys isteıdi», - dep málimdedi QR Ulttyq ulanynyń baspasóz qyzmeti.