Kıevte qazaqstandyq jas daryndar top jardy
Osymen on birinshi ret uıymdastyrylǵan án báıgesine álemniń 9 elinen 75 bala qatysqan. Qazaq qyzdarynyń óneri men ulttyq kıimi kórermen kózaıymyna aınalyp, qazylar alqasynyń joǵarǵy baǵasyna ıe boldy.
«Jas Eýropa» dep atalatyn halyraqaralyq án baıqaýy bıyl «avtorlyq», «ulttyq» jáne «estradalyq án» ári «álemdik hıt» dep atalǵan bes atalym boıynsha uıymdastyryldy. Bıylǵy baıqaýǵa alǵash ret Qazaqstannyń balalary arnaıy shaqyrylyp otyr. 10 men 14 jas aralaǵyndaǵy qyzdarymyz: Jibek, Saıajan, Aıǵanym shetelge alǵash shyqqandaryn aıtady. Qobaljyp turǵanyna qaramastan, jas órender jaqsy óner kórsetti.
«Negizgi kóılegim barlyǵyna óte ádemi kórindi. Óıtkeni biz muny tiktirtken kezde adamnyń kózine tez túsetindeı, ádemi kórinetindeı etip tiktirttik. Jáne kóbisi qaı jerden jáne qalaı tiktirttiń dep suraıdy. Meniń ánim «Týǵan jer» dep atalady, bul kórermenge óte jaqsy unady», - dedi Jibek Eltaı.
Ýkraına, Italııa, Polsha, Serbııa, Horvatııa, Perý, Ońtústik Koreıa, Izraıl jáne Qazaqstan bıylǵy baıqaýǵa álemniń 9 elinen 75 ánshi bala qatysty.
«Qazylar múshesi álemniń segiz elinen irikteldi. Álbette, Ýkraına tarapynyń ókilderi baıqaýǵa eń belsendi qatysty. Qazaqstannyń atynan óner kórsetken jas ónerpazdardyń ónerleri joǵary baǵalanyp, balalardyń barlyǵy júldeger atandy. Qazaq balalarynyń daýysy, sahna kıimderi jáne án salý óneri joǵary baǵalandy», - dedi «Jas Eýropa» halyqaralyq án baıqaýynyń dırektory Tatıana Apanasenko.
Qazaqstannan kelgen úsh qatysýshy da quralaqan qalmady, baıqaý qorytyndysy boıynsha «vokal» jáne «ulttyq án» atalymdary negizinde jáne jas erekshelikterine qaraı 1, 2 jáne 3-oryndy Qazaqstannyń balalary ıelendi.