Kıevte Aıdos Sadyqovqa qastandyq jasady degen kúdiktiniń bireýi Qazaqstannan tabyldy

<p>ASTANA. KAZINFORM — Qazaqstannyń Bas prokýratýrasy Kıevte qazaqstandyq jýrnalıst Aıdos Sadyqovty atyp ketti dep aıyptalǵan kúdiktilerdiń bireýi qamalǵanyn habarlady. </p>

Memleket basshysynyń tapsyrmasymen Bas prokýratýra 18 maýsymda Kıev qalasynda Aıdos Sadyqovqa jasalǵan qastandyq deregi boıynsha qylmystyq is qozǵaǵan.

Ýkraınanyń quqyqqorǵaý organdary jedeldigi men kásibıligin kórsete otyryp, qysqa merzimde osy qylmysty jasaǵan tulǵalardy anyqtady.

«Bas prokýratýra Ýkraınanyń quziretti organdaryna Jaqanbaev pen Qarataevtyń jasalǵan qylmysqa qatysy týraly qylmystyq istiń materıaldaryn berý jóninde halyqaralyq tergeý tapsyrmasyn joldady. 21 maýsymda Altaı Jaqanbaev Qazaqstan Respýblıkasynyń ishki ister organdaryna óz betinshe habarlasyp, odan istiń mán-jaıy boıynsha jaýap alyndy. Sol kúni ol osy qylmysty jasady degen kúdikpen ustaldy» dep habarlady vedomstvodan.

Meıram Qarataevtyń qaıda júrgenin anyqtaý úshin jedel izdestirý sharalary júrip jatyr.

«Tergeý múddesi úshin ózge aqparat jarııalanbaıdy» dep eskertti Bas prokýratýra.

Eske sala keteıik, 18 maýsymda Kıevte turatyn jýrnalıst Aıdos Sadyqovty úıiniń janynda áldebireýler atyp ketti. Ol qazir aýrýhanada jatyr.

Ýkraına prokýratýrasy eki kúdiktiniń sol kúni-aq shekarany kesip ótip, elden ketip qalǵanyn habarlady.

Bas prokýratýra Aıdos Sadyqovty óltirmek bolǵandardy tabý úshin óz betinshe tergeý bastaǵan edi. 

Keshe, 21 maýsymda Іshki ister mınıstrligi Aıdos Sadyqovqa oq atty degen kúdiktiniń Qazaqstan polıtsııasynda jumys istemeıtinin habarlady.

Memleket basshysy qastandyqty tergeý amaldaryn jiti baqylap otyr.