Kids go free: Qazaqstandyq otbasylar 26 mln teńge únemdedi

ASTANA. QazAqparat – Jyl basynan beri Kids go free baǵdarlamasy arqyly 600-den astam bala tegin ushaq bıletimen qamtyldy. El ishindegi saıahatty tańdaǵan 300-den astam qazaqstandyq otbasy 26 mln teńgege deıin únemdedi, dep habarlaıdy QazAqparat.

Kids go free – Mádenıet jáne sport mınıstrligi ázirlegen otbasylyq týrızmge arnalǵan baǵdarlama. Qazaqstandyqtar týrıstik operatordan el ishindegi baǵyttar boıynsha týrıstik paket satyp alǵanda 2 jastan 17 jasqa deıingi balalarǵa tegin avıabılet ala alady. Baǵdarlama aıasynda orta eseppen bir týrda eki bala saıahattaıdy.

Máselen, maýsym aıynda eń tıimdi saıahat Astana – Shymkent – Astana baǵyty boıynsha tirkelgen. Birden 3 nemese odan da kóp balasy bar 3 otbasy josparlanǵan bıýdjettiń 40 paıyzynan astamyn únemdegen.

«Baǵdarlama boıynsha saıahattaý ońaı ári qoljetimdi. Ol úshin kids.gofree.kz saıtyna kirý kerek. Keńes alyńyz jáne otbasyńyzǵa sáıkes keletin týr paketin tańdańyz. Qajetti qujattardy usynyp, týr paketin satyp alý úshin kelisimshart jasańyz jáne balalaryńyz úshin tegin áýe bıletin alyńyz», - deıdi MSM Týrızm ındýstrııasy komıtetiniń tóraǵasy Dastan Ryspekov.