KIDS GO FREE – balalar tegin saıahattaıtyn keremet joba

<p>Balamen qydyrý dese bas tartatyn otbasylar kóp. Sebebi, ár balanyń júris-turysy eresekterge ketetin somadan asyp túspese kem túspeıdi. Aılyǵy shaılyǵynan aspaıtyn qarapaıym kópbalaly ata-analar saıahattaý jaıynda tipten armandamaıdy. Al biz olarǵa &laquo;jolaqysyn tek eresek adam úshin tóleńiz&raquo; - desek ne bolady? Armanyńyzdy iske asyratyn aıtýly joba jaıynda bilesiz be?</p>

Halyqtyń qulaǵyna jetpeı júrgen aqpardyń biri – osy. El ishindegi týrızmdi damytý maqsatynda «Kazakh Tourism» UK» balalarǵa arnalǵan Kids Go Free baǵdarlamasyn usynǵan eken. Aıtpaqshy, Astana qalasy balalar tegin saıahattaǵan úzdik bes qalanyń tiziminde ekenin aıta ketýimiz kerek. Óńirdegi balalar elordany kórýge yntyq. Qulaǵdar bolǵan qanshama ata-ana bul múmkindikti paıdalandy. Al bilmeı qapy qalǵandar qanshama?

Kámelet jasyna tolmaǵan tórt balasy bar Ahmetovtar otbasy Almaty oblysyna saıahaty úshin anaǵurlym az tólegenderin aıtyp, alǵys bildirdi. Manǵystaý oblysynyń turǵyndary bul jobany alǵash estigende senbegen. Áleýmettik jeli paraqshasynan oqyǵan áýlet týrfırma arqyly saıahatyn rásimdegende tek anasynyń bıletine tólegende ǵana jobanyń tıimdiligine kózi jetken. Tilektes Ahmetova trendtegi baǵyttardyń biri Almaty oblysyndaǵy Kólsaıǵa balalaryn aparýdy burynnan josparlaǵan.

Tilektes hanymnyń aıtýynsha, tórt balasyna ushaq bıleti túgeldeı tegin bolǵan: «Balalarymnyń boıyna patrıottyq sezim uıalatý – meniń analyq paryzym. Shetelde otbasymen qydyryp júretin otbasylarǵa únemi qyzyǵatynmyn. Kids go free jobasy arqyly men de balalaryma baqytty balalyq shaq syılap, elimizdiń kórikti jerlerin aralaýdy bastadym. Bul joba aldaǵy jyldary da júzege assa eken degen tilegim bar» - deıdi kópbalaly ana.

Endeshe, bile júrińiz:

• El ishinde kez-kelgen qalaǵa 2 men 17 jasty qosa alǵandaǵy aralyqtaǵy kez-kelgen bala tegin ushady.
• Ushaq bıleti týrıstik kompanııalar arqyly alynady.
• Tegin bılet bala sanyna qaramaıdy, ıaǵnı ata-ana qansha balamen ushsa da, ol tegin bolmaq. Baǵdarlamanyń bul artyqshylyǵy - ásirese, kópbalaly otbasylarǵa óte tıimdi.
• Kids Go Free baǵdarlamasy engizilgen týrıstik kompanııalar sany kúnnen kúnge artyp keledi.
• Joba qoldanýshylary ósse, tegin ushýdy rásimdep beretin týrfıra sany da artady.

Tegin áýe bıletterin alýda esh kedergi joq, sebebi ata-anasymen birge saıahattaıtyn bala sany men saıahattaý kólemine shekteý joq. Elimizdiń qaı óńirin alsaq ta, tumsa tabıǵaty ǵajap jáne tarıhı eskertkishterge baı jerler jeterlik. Balalardy kezekpen alyp shyǵatyn aqsha únemdeý kezeńi artta qalǵan sekildi. Saıahatqa shyqqan ár balanyń jol júrý bıletin memleket óz moınyna aldy.

Mysaly, Aqtaý qalasynyń turǵyndary Almaty, Túrkistan óńirlerin aralap, balalaryna elimizdiń kórikti jerlerin kórsetti. Kópbalaly anamen tildeskenimizde: «Meniń ata-analarǵa aıtatynym, bul memleket tarapynan beriletin óte tıimdi kómek. Sebebi Kids Go Free-siz barǵan jaǵdaıda tórt balasy bar otbasy úshin Aqtaý-Almaty, Almaty-Aqtaý baǵytyna 500-600 myńdaı aqsha keter edi. Biraq osy baǵdarlama arqyly tek 350-360 myńdaı ǵana aqsham ketti. Bıletke joldasym ekeýmizge tóledik. Tórt balamyz tegin baryp keldi» - dep rızashylyǵyn bildirdi.

Eń bastysy ushý kúni jaqyndaǵanda aspandap ketetin áýe bıletteriniń kez-kelgeni óteledi. ıAǵnı bılet alynǵan kúni baǵa qandaı bolsa, memleket sol aqshany tólep beredi. Jobanyń basty sharty – saıahatty týrfırma arqyly rásimdeý ǵana. Bul elimizdegi týrıstik kompanııalardyń jumysyn da damytpaq.

2022 jyly bul qyzmet túrin 1500 bala qoldanyp, 76,2 mıllıon teńge sýbsıdııa tólengen. Al bıylǵy jyldyń 1 jeltoqsanǵa deıingi esepke qarasaq, 920 usynys qanaǵattandyrylyp, 1975 bala 90 mıllıon teńgege ushqan.

Bul aımaqtarǵa tegin ushqan balalar sanyna kóz júgirtip ótsek, Alakólge 637, Almatyǵa 561, Aqtaýǵa 352, Túrkistanǵa 154, Astana qalasyna 120 bala tegin saıahattady. Áýe bıletterin tegin alǵan bala sanymen eseptesek Alakól baǵyty maýsymdyq bolǵanyna qaramastan úlken suranysqa ıe, deıdi mamandar. Bir jyldyń ishinde saıahatqa shyqqan balalar sany 500-ge jýyq kóbeıgeni qýantady. Demek, saıahattaý arqyly qaltasyna salmaq túsirmeı, qarjysyn únemdegin otbasylar qatary da ósken.

Halyq habardar bolsa, tıimdi jobanyń kómegin ózgeler de kórmek. Endeshe, 2024 jyly otbasyńyzben Qazaqstandy saıahattaý jyly bolsyn!