Kıbershabýyldan qorǵanýǵa UQK arnaıy uıymy jaýap beredi - Baǵdat Mýsın

ASTANA. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın memlekettik aqparattyq resýrstarǵa DDoS-shabýyldar týraly pikir bildirdi, dep habarlaıdy QazAqparat tilshisi.

Onyń aıtýynsha, kıbershabýyldardan qorǵaný mınıstrlik quziretinde emes.

«Bul sala boıynsha biz zań men standarttar jazamyz, al kıbershabýyl men qorǵanysqa arnalǵan Ulttyq qaýipsizdik komıtetiniń arnaıy memlekettik uıymy bar, ol – Memlekettik tehnıkalyq qyzmet. Biz jalpy zań talaptaryn jáne basqa da talaptardy bekitemiz, olar sol boıynsha jumys isteıdi. Qazir eldegi ınternet júıelerine aýyrtpashylyq tústi, onyń jyldamdyǵy baıaýlady. Memlekettik tehnıkalyq qyzmet ári qaraı jumystaryn jalǵastyrýda», - dedi Baǵdat Mýsın Úkimette tilshilerge bergen suhbatynda.

Óz jaýabynda mınıstr aqparattyq qaýipsizdik – kúrdeli máselelerdiń birine aınalǵanyn atap ótti.

«Dúnıejúzinde túrli memlekettik uıymdar kún saıyn kıbershabýyldarǵa toıtarys beredi. Jańa ınternet dáýiri keldi. Internet ekonomıkaǵa jańa tásilder, jańa múmkindikter beredi, sonymen qatar qaýipsizdik jaǵynan da jetildirýdi qajet etedi», - dedi Baǵdat Mýsın.

Aıta keteıik, Qaznetke birneshe kún boıy tolassyz kıbershabýyl jasalyp jatyr. Maqsatty kıbershabýyldar eldiń memlekettik organdaryna da, Qaznet ınfraqurylymyna da baǵyttalǵan.