Kıberqaýipsizdik: «Qazposhtanyń» onlaın servısterindegi aqaýlar jóndeldi

ASTANA. QazAqparat – «Qazposhta» AQ onlaın qyzmetterinde aqaý týyndap, qalpyna keltirý jumystary júrgizildi, dep habarlaıdy QazAqparat tilshisi.

«2022 jylǵy 7 qazanda «Qazposhta» AQ servısteriniń qoljetimdi bolmaı qalǵany anyqtaldy. Tehnıkalyq problemalar syrttaǵy provaıder - Pavlodar qalasyndaǵy «Qazklaýd» JShS derekterdi óńdeý ortalyǵynda baıqaldy. Taldaý júrgizý kezinde «Qazklaýd» JShS-ne problemalardy joıýǵa ótinim jiberildi», - dep jaýap berdi «Qazposhta» AQ baspasóz qyzmeti agenttik saýalyna.

Baspasóz qyzmetiniń aıtýynsha, «Qazklaýd» JShS vırtýaldy mashınalarynyń derekterdi saqtaý júıesinde týyndaǵan qateler «Qazposhta» AQ barlyq servısterin qoljetimsiz etken.

«Tańnan beri qalpyna keltirý jumystary júrgizildi - qyzmetter iske qosylyp, júıelerdiń jumysy tekserildi. Qazirgi ýaqytta qalpyna keltirý jumystary aıaqtaldy, júıeler qalypty rejımde jumys istep tur», - deıdi Qazposhta.

Osyǵan deıin Qaznetke birneshe kún boıy tolassyz kıbershabýyl jasalyp jatqany týraly habarlandy.