Kıberbýllıng týraly zań boıynsha barlyq taraptyń pikiri eskerildi – Aıdos Sarym
«Birneshe ret suhbat bergenmin, oǵan kóńilim tolady. Meniń oıymsha, barlyq tarap ózin jeńimpaz dep sanaı alatyn zań dep esepteýge bolady. Sebebi zań ázirlegen adamdar retinde osynsha syndy basymyzdan ótkerdik. Atap aıtqanda, ony Parlamenttiń qabyldaǵanyna, Prezıdenttiń qol qoıýyna jiberilgeni kóńilimizden tolyǵymen shyǵady», - dedi A. Sarym tilshiler saýalyna jaýap bere otyryp.
Osy oraıda atalǵan qujat aıasyndaǵy sarapshylar tobyna qatysty pikir bildirdi.
«Zańdy synaǵan azamattar, zańǵa kúdik týdyrǵandar, osy qujat bizge qaýip tóndiredi degen azamattar da ózin jeńimpaz dep sanaı alady. Óıtkeni ýákiletti organ Aqparat mınıstrliginiń quqyqtary naqtylandy, shekteldi. Syn aıtqandar saraptama tobynyń quramyna kirýge múddeli bolýy kerek sııaqty. Ekinshiden, bizge «balalardyń quqyǵyn jeleý etip, áleýmettik jelini buǵattap tastaǵysy keledi» degen pikir aıtyldy. Senatorlar qujat ishine naqty bap engizdi, ıaǵnı bul tek kıberbýllıngke qatysty jaǵdaılardy ǵana qamtyǵan», - dedi depýtat.
Sonymen qatar ol birinshi nusqada da eshqandaı qaıshylyq bolmaǵanyn alǵa tartty. Bul zań bastapqydan ınternetti buǵattaýǵa nemese bireýdiń quqyǵyn shekteýge baǵyttalmaǵan.
Aıta keteıik, búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgerispen kelisti.
Osylaısha, senatorlardyń usynysy boıynsha Aqparat jáne qoǵamdyq damý mınıstrligi óz qalaýy boıynsha ınternet-resýrstardyń, áleýmettik jeliler men messendjerlerdiń jumysyn shekteýge nemese toqtatýǵa múmkindigi bolmaıdy. Tek balaǵa qatysty kıberbýllıng dep tanylǵan aqparatty ǵana joıýǵa bolady.
Balalarǵa qatysty kıberbýllıng qandaı bolmaq, ózgesi qandaı bolady, senatorlar ony memlekettik organǵa emes, arnaıy qurylǵan sarapshylar tobyna sheshýdi usyndy.