Kıberbýllıng faktilerin arnaıy komıssııa 3 kúnde qaraıtyn bolady

NUR-SULTAN. QazAqparat – QR Aqparat jáne qoǵamdyq damý vıtse-mınıstri Danııar Qadyrov kıberbýllıng oqıǵalaryna monıtorıng júrgizý tártibin túsindirdi, dep habarlaıdy QazAqparat.

«Biz olardy tekseretin qadaǵalaýshy organ emespiz. Eger ata-analardan nemese zańdy ókilderden balaǵa qatysty kıberbýllıng jóninde ótinishter tússe, olardy ýákiletti organ qaraıtyn bolady», - dedi Danııar Kádirov Senattyń jalpy otyrysynan keıin tilshilerge bergen suhbatynda.

Onyń aıtýynsha, qazirgi ýaqytta ýákiletti organ – Aqparat jáne qoǵamdyq damý mınıstrligi bolyp otyr.

«Mınıstrlik janynan psıhologtardy, lıngvısterdi tarta otyryp, sarapshylar toby qurylady. Kez kelgen shaǵym úsh kún ishinde qaralady, kontent jaryq kórgen pablık nemese ınternet-resýrstyń ókiline habar jiberiledi. Osylaısha kontent 24 saǵat ishinde joıylady. Bul balalar psıhıkasy, munda ýaqyt ótkizýge bolmaıdy, sondyqtan naqty ári jyldam sheshimder qabyldaý qajet», - dep túıindedi vıtse-mınıstr.

Eske sala ketsek, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaıtaryldy.

Buǵan deıin Beıbit Isabaev zańǵa engizilgen naqty 4 túzetýdi túsindirgen edi.