Kia Qazaqstan birlesken kásiporny 2025 jyly ashylady
Taraptar birlesken óndiris, oqshaýlaýdy tereńdetý jáne Qazaqstannyń avtomobıl ónerkásibi úshin ınjenerlik kadrlardy daıarlaý máselelerin talqylady.
«Qazaqstan men Koreıa – qarym-qatynastary qarqyndy damýymen erekshelenetin elder. Álemge áıgili brendke nazar aýdarý Qazaqstannyń barlyq avtomobıl ónerkásibi úshin mańyzdy oqıǵa. Bul búginde memlekettiń ındýstrııalyq damýynyń strategııalyq mańyzdy quramdas bóligi», – dep atap ótti R.Sklıar.
Kezdesý barysynda QR-da «Kia Qazaqstan» birlesken kásipornyn qurý boıynsha quryltaı qujattaryna qol qoıyldy, ol Qostanaı qalasynda brendtiń jańa zaýytynyń qurylysyna, elimizdegi avtoónerkásiptiń jergilikti ortalyǵynyń paıda bolýyna jáne jańa formattaǵy tehnıkalyq mamandardy daıarlaýǵa jetekshilik etetin bolady. Investorlar jobaǵa 90 mlrd teńge salady.
«Qazaqstanda Kia zaýytyn qurý týraly sheshim Respýblıka Prezıdenti men Úkimetiniń joǵary deńgeıde nazar aýdarýynyń arqasynda qabyldandy. Biz óz tarapymyzdan barynsha kúsh-jigerimizdi salamyz jáne alǵashqy qadam retinde qurylysty osy jyldyń qazan aıynda bastaımyz. Jalpy, Kia-nyń sheteldegi mundaı yntymaqtastyǵy álemde teńdesi joq ekenin atap ótkim keledi», – dedi Sang Gvon Djong.
Jańa Kia zaýytynda óndiristiń tolyq kezeńi 2025 jyly ashylady dep habarlandy. Onyń óndiristik alańy 85 myń sharshy metrden asady, 1500-ge jýyq jumys ornyn qurý josparlanýda.
Aıta ketý kerek, zaýyt qurylysynyń josparyn ınvestorlar QR Prezıdenti Qasym-Jomart Toqaevtyń Qostanaı qalasynda brendtiń shaǵyn óndirisin iske qosý sapary kezinde alǵash ret aıtqan bolatyn. Ónerkásiptik yntymaqtastyq jobasy Qazaqstan-Koreıanyń ekijaqty ekonomıkalyq yntymaqtastyǵynyń jarqyn úlgisine aınaldy.
Ótken jyldyń sońynda eki el arasyndaǵy taýar aınalymy $6 mlrd-tan astam bolsa, Koreıadan Qazaqstanǵa quıylǵan tikeleı sheteldik ınvestıtsııa kólemi $1,5 mlrd-qa jetti, bul – ekonomıkalyq qatynastardyń búkil tarıhyndaǵy rekordtyq kórsetkish.