ASTANA. KAZINFORM — Qurlyqtyq hokkeı lıgasynyń (QHL) turaqty chempıonatynda elordalyq «Barys» kezekti kezdesýin Novosibirde «Sıbır» komandasymen ótkizdi.
Hokkeı mamandary match aldynda aıdyn ıelerin oıynnyń favorıti dep ataǵan. «Sıbır» sony dáleldep, 2:0 esebimen jeńiske jetti.
Birinshi kezeńde Tımýr Ahııarov esep ashsa, ekinshi taımda Vladımır Býtýzov óz múmkindigin múlt jibergen joq.
Osyǵan deıin óz aıdynynda qatarynan 8 ret jeńilgen «Sıbır» sol sátsiz serııany toqtatty. 27 upaı jınaǵan novosibirlikter Shyǵys konferentsııasynda 9-orynda bolsa, astanalyqtar burynǵysha 11-orynda tur.
Endi Ǵalym Mámbetálıev jattyqtyratyn hokkeıshiler 29 qarasha kúni Magnıtogorskide «Metallýrgpen» sheberlik baıqasady.
Eske sala keteıik, budan buryn «Barystyń» jeńip jatyp, jeńilip qalǵanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).