QHA Tóraǵasynyń orynbasary E. Toǵjanov EQYU Joǵarǵy komıssar ókilimen kezdesti

ASTANA. QazAqparat - Búgin Astanada Qazaqstan halqy Assambleıasy Tóraǵasynyń orynbasary-Qazaqstan halqy Assambleıasy Hatshylyǵynyń meńgerýshisi Eraly Toǵjanov EQYU ulttyq azshylyq isteri jónindegi Joǵarǵy komıssardyń saıası keńesshisi Mark Fýmagallımen kezdesti.

«Biz biraz jyldar boıy Eýropadaǵy qaýipsizdik pen yntymaqtastyq uıymymen yntymaqtasa jumystar atqaryp kelemiz. Tipti bir kezderi ózara is-qımyl týraly memorandým da qabyldaǵan edik. Joǵarǵy komıssar Knýt Vollebek te Qazaqstanǵa jıi kelip turatyn», - dep atap ótti áńgime barysynda E. Toǵjanov.

Sonymen qatar, QHA tóraǵasynyń orynbasary qazaqstandyq ultaralyq kelisim úlgisiniń qalyptasý tarıhyna toqtalyp, osynaý úlginiń álemniń kóptegen elderinde moıyndalǵanyn atap ótti. Onyń aıtýynsha, Qazaqstanda barlyq etnos ókilderiniń mádenıetin, tili men dástúrin saqtap, damytýǵa barlyq jaǵdaılar jasalǵan. Budan bólek, E. Toǵjanov QHA jumysy men Assambleıadan saılanǵan depýtattar qyzmeti týraly meımanǵa baıandap berdi.

«Jalpy Qazaqstan halqy Assambleıasy biregeı ınstıtýt. Ol atqarýshy bıliktiń barlyq organdarymen yntymaqtasa jumys isteıdi. Al QHA-dan saılanǵan depýtattar Parlamentte basqa partııalyq fraktsııalarmen, depýtattyq toptarmen belsendi yntymaqtasa qyzmet etip keledi», - dedi E. Toǵjanov.