QHA Tóraǵasynyń orynbasary: Birligimizdi joǵaltpaı qatań shekteý sharalaryn ustansaq, bul indetti de jeńemiz
«Bárimizge belgili, keshe Memlekettik komıssııa birqatar qatań shekteý sharalaryn 5 shildeden bastap 2 aptaǵa engizý týraly sheshim qabyldady. Menińshe, olar - óte ýaqtyly ári qajetti sharalar. Sebebi qazirgi kúni koronavırýs ınfektsııasy búkil elimizge taralyp, barsha qazaqstandyqtardy alańdatyp otyrǵany belgili. Búginde bul indettiń qaýipti ekendigine, jedel tarap jatqandyǵyna qatysty jurtshylyq arasynda esh kúmán qalǵan joq. Bári bilip, senip otyr. Iá indetke shaldyqqandarǵa medıtsınalyq kómekti kúsheıtýge baǵyttalǵan sharalar da qolǵa alyný ústinde. Buǵan qosa, dárigerlerimiz, mamandarymyz bul indetten qalaı emdelýimiz kerektigin, qandaı dárilerdi ishýge bolatyndyǵyn túsindirip te jatyr. Osy oraıda keshegi jarııa etilgen qatań shekteý sharalary indetke shaldyqqandardy emdeý jáne turǵyndar arasynda indetti taratpaý isin tolyqtyra túsedi», - dedi Sherzod Pýlatov.
QHA tóraǵasy orynbasarynyń atap ótýinshe, Memlekettik komıssııa engizip otyrǵan qatań shekteý sharalary oıdan shyǵarylyp otyrǵan joq. Olar mamandandyrylǵan ınstıtýttardyń zertteýleri, taldaýlary negizinde berilgen usynystarǵa baılanysty ázirlengen.
«Tarıhymyzda qanshama qıynshylyq boldy. Barlyq qıyndyqty tártipke boısunýdyń, aýyzbirshilik pen yntymaqtyń arqasynda jeńip shyqtyq. Aldaǵy ýaqytta da birligimizdi joǵaltpaı, bárimiz bir adamdaı osy qatań sharalardy ustanatyn bolsaq, bul vırýsty da jeńip shyǵatyn bolamyz. Aldaǵy ýaqytta jaqsy kúnderde, mereıtoılarda bas qosyp, erkin ómirge oralatyndyǵymyzǵa senimim mol», - dedi ol.