QHA sessııasy: Elimizdiń keń dalasynda barlyǵyna oryn bar - agrarshy Kırıll Pavlov

ASTANA. QazAqparat - Agrarlyq sektordy tabysty emes dep sanaý - qate pikir. Bul týraly Qazaqstan halqy Assambleıasynyń XXVI sessııasynda «Baıserke-Agro» dırektory Kırıll Pavlov málim etti, dep habarlaıdy QazAqparat tilshisi.

 "ІT salasynda bilim aldym, ekonomıst qyzmetin atqardym, keıinnen jýrnalıst, jazýshy da bolyp kórdim. Alaıda aýyl sharýashylyǵyna oraldym. Búginde ómirge nemese múmkindiktiń joqtyǵyna keıip júrgenderdi kórgen kezde, olarǵa: "egistikke baryp jumys isteńder, Qazaqstan aýqymdy agraralyq áleýeti bar memleket. Elimizdiń keń dalasynda barlyǵyna oryn bar!" dep aıtamyn. Jastar agrarlyq sektordy tartymdy ári tabysty emes dep sanaıdy. Alaıda bul qate pikir. Bizdiń agroholdıngtiń jumysyn kórsetken kezde, olarda basqasha pikir qalyptasady. Meniń oıymsha, "Bes áleýmettik bastama" bolashaq urpaq úshin qajetti jaǵdaıdyń negizin qalady. Úlken eńbeksiz ómirde jeńis bolmaıdy", - dedi K. Pavlov.

Osy oraıda Memleket basshysy Nursultan Nazarbaev aýylda jumys isteýge nıettiler úshin shaǵyn nesıeler beriletinin atap ótti. "Sáıkesinshe, qajetti mamandyqqa da oqytamyz. Elimizde jumyssyz júrý múmkin emes. Bul rette eńbek etýden taıynbaı, jumys isteýge mashyqtaný kerek. Jańa ǵana aýyl sharýashylyǵyndaǵy jańa tehnologııalar týraly aıtyldy. Osynyń barlyǵy óte durys", - dep toqtaldy Prezıdent.

Bul turǵyda Elbasy búginde aýylda eńbek ónimdiligi óte tómen ekenin, jańa tehnologııasyz jetistikke jetý múmkin emestigin jetkizdi.

"Aýyl sharýashylyǵynda eńbek ónimdiligi men jańa tehnologııalar ǵylymyn engizý basty másele ekenin únemi aıtyp kelemin", - dedi Prezıdent.


Foto: zhetysu-gazeti.kz