QHA RF Memlekettik dýmasyndaǵy Ulttar isi komıtetimen áriptestik ornatady
Kezdesý barysynda taraptar kórshiles eki memleket arasyndaǵy birlese jumys atqarý, qoǵamdyq kelisim jáne birlik, azamattyq birtektilikti nyǵaıtýdy qamtamasyz etý jónindegi ózekti suraqtardy qarastyrdy.
Qazaqstan halqy Assambleıasy Tóraǵasynyń orynbasary Darhan Myńbaı elimizdegi etnosaralyq qatynastar salasyn tilge tıek ete otyryp, beıbitshilik pen kelisimniń qazaqstandyq modeliniń túpki prıntsıpterin, sonymen qatar Qazaqstanda júzege asyrylyp jatqan qoǵamdyq sanany jańǵyrtý baǵdarlamasynyń maqsattary men mindetterine toqtalyp ótti.
«Kezdesýde biz ulttyq saıasat, ultaralyq qarym-qatynastardy qurýdyń qazaqstandyq tájrıbesi jaıly kóp sóılestik. Sonymen qatar ultaralyq qatynastar tóńireginde jumys isteıtin parlamentarııalarmen is-tájirıbe almasý jáne birlese jumys isteý jóninde kelistik. Bul - biz úshin óte mańyzdy jáne qajet. Qazaqstanda osy rettegi zańdar qalaı jumys isteıtinin bilgimiz keledi», - dedi qazaqstandyq delegatsııamen bolǵan kelissózderdiń qorytyndylary jaıly aıtqan RF Memlekettik dýmasyndaǵy Ulttar isi komıtetiniń tóraǵasy.
I. Gılmýtdınov sonymen qatar, eki el arasyndaǵy mundaı eki-jaqty tájirıbe almasýdyń mańyzdylyǵyna jáne ákeler paıdasyna da toqtalyp ótti.
«Qoǵamdyq uıymdar qurý barysynda, biz kóp dúnıeni Qazaqstannan úırengenimizdi jasyrmaımyz. Reseı halqy Assambleıasyn qurýdyń negizgi úlgisin biz Qazaqstannan aldyq. Sondyqtan, mundaı is-tájirıbe almasýdyń biz úshin bereri kóp. Biz - bir-birimizden úırenýimiz kerek, bir-birimizge kómektesýimiz kerek,-dedi I. Gılmýtdınov.
Eske sala keteıik, Qazaqstan halqy Assambleıasynyń delegatsııasy 27-28 qarasha kúnderi Máskeýge resmı is-saparmen barǵan bolatyn. Eki kúndik baǵdarlama aıasynda QHA ókilderi reseılik áriptesterimen kezdesip, birneshe resmı sharalarǵa qatysty.
RF Ulttar isi boıynsha federaldyq agenttiginiń jetekshisi Igor Barınovpen kezdesý barysynda, qos tarap etnosaralyq qatynastar salasyndaǵy yntymaqtastyqtyń aldaǵy josparlaryn talqylady. Kezdesý qorytyndysynda Qazaqstan halqy Assambleıasy men RF Ulttar isi boıynsha federaldyq agenttiginiń arasyndaǵy memorandýmǵa qol qoıyldy.
QHA ókilderi sonymen qatar RF Prezıdenti Ákimshiligi jetekshisiniń orynbasary M. Magomedovpen kezdesip yntymaqtastyqtyń jańa vektorlaryn talqylady.
Reseıdiń memleket jáne qoǵam qaıratkeri Rýslan Aýshevpen kezdesý barysynda Darhan Myńbaı elimizdegi «Rýhanı jańǵyrý», «Týǵan jer» sııaqty baǵdarlamalardyń negizgi baǵyttary jaıly, onyń júzege asyrylýy týraly aıtty. Qazaqstannyń týmasy sanalatyn R. Aýshev atalmysh jobalarǵa úlken qyzyǵýshylyq tanytty.