QHA ózine júktelgen mindetterdi tolyq oryndaı aldy - Zada Dúkenbaeva

NUR-SULTAN. QazAqparat – 26 jylda Qazaqstan halqy Assambleıasy ózine júktelgen mindetterdi tolyq oryndaı aldy. Mundaı pikirdi tarıh ǵylymdarynyń doktory, L.Gýmılev atyndaǵy EUÝ professory Zada Dúkenbaeva bildirdi, dep habarlaıdy QazAqparat tilshisi.

«26 jylda Qazaqstan halqy Assambleıasy týyndaǵan túrli máselelerdi ýaqytyly sheship, aldyna qoıylǵan mindetterdi tolyq oryndaı aldy. Biz ǵylymdy, mádenıetti jáne ekonomonıkany damytý jolynda ultqa bólinbeı eńbek ettik. Aq nemese qara dep alalamaı, jumyla júk kóterip, birilikte ómir súrýimizge qazaqtyń qonaqjaılyq qasıeti negiz boldy dep oılaımyn. Qazaq jep otyrǵan bir úzim nanyn qonaǵyna dep saqtaǵan halyq. Jerimizdiń kólemi qandaı keń bolsa, ultymyzdyń da peıili sondaı darhan», - dedi Zada Orazǵalıqyzy.

Sonymen qatar tarıh ǵylymdarynyń doktory qazaqstandyqtardy kele jatqan 1 mamyr - Qazaqstan halyqtarynyń birligi kúni merekesimen quttyqtady.

«Qazaqstandy meken etken barsha ult ókilderine ashyq aspan, denine saýlyq tileımin! Álemdi jaılaǵan indetten aman ótip, qazaqtyń kók týynyń astynda tatý-tátti ómir súreıik!», - dep izgi tilegin jetkizdi Zada Dúkenbaeva.

Eske sala keteıik, Prezıdent Qasym-Jomart Toqaev Qazaqstan halqy Assambleıasynyń jıyrma toǵyzynshy sessııasyn shaqyrý týraly Jarlyqqa qol qoıǵan bolatyn. Sessııa 28 sáýirde elordadaǵy Nazarbaev ortalyǵynda ótedi.