QHA-nyń 20 jyldyǵyna oraı «Qazaqstan» RTRK alǵash ret B.Momyshulynyń «Ushqan uıa» povesiniń radıonusqasyn usynady

ASTANA. QazAqparat - «Qazaqstan» respýblıkalyq teleradıokorporatsııasyna qarasty «Qazaq radıosy» Qazaqstan Halqy Assambleıasy jyly aıasynda Keńes odaǵynyń batyry, qazaqtyń qaharman uly, jazýshy Baýyrjan Momyshulynyń «Ushqan uıa» týyndysynyń radıonusqasyn daıyndap, jurtshylyqqa alǵash ret efır arqyly usynyp otyr, dep habarlady «Qazaqstan» RTRK baspasóz qyzmeti.

«Ushqan uıa» povesiniń ereksheligi sol - búgingi biz izdep júrgen ulttyq ıdeıa, biz joǵaltyp júrgen ulttyq bolmys, tirligimizden birtindep ysyrylyp, óńi aınalyp bara jatqan ulttyq salt-dástúr, ádet-ǵuryptarymyz, ár keıipkerdiń minezi, sózi, qımyl-áreketi arqyly jandy kórinisteı kóz aldyńa keledi. Sol qazaqy minez, ádet-ǵuryptar ultyna, jasyna, dinine qaramastan Qazaqstannyń árbir turǵynyn qyzyqtyryp, halqymyzǵa degen qurmetin arttyryp, baýyrmaldyq pen týystyqqa, syılastyqqa shaqyrady.

Keshegi taǵdyrdyń talaı synaǵyna moıymaı, bar asyl qasıetti nemereleriniń boıyna úıip tókken asyl analar, qarııalardyń qatal qabaǵynan yǵyp, úlkenniń aldyn kese ótpeı, izet kórsetken kishilerdiń úlgi-ónegesi, úlkendik jolyn qadir-qasıetimen moıyndatqan aldyńǵy býynnyń aqyl-naqyl, tálim-tárbıesi búgingi urpaq úshin baǵa jetpes taǵylym, tárbıeniń kózi deýge bolady.

«Qańtar aıynyń 28-inen bastap efırge jol tartqan bul biregeı joba 37 bólimnen, ár bólimi 10-15 mınýttan turady. Sondaı-aq, Baýyrjan Momyshulynyń «Ushqan uıa» povesiniń orys tilindegi «Nasha semıa» atty nusqasy da kóp uzamaı Qazaq radıosy arqyly efırge shyǵatynyn habarlaımyz.

Ár aptanyń sársenbi, beısenbi kúnderi 19 saǵat 10 mınýtta «Qazaq radıosynyń» efırinen qazaqtyń qaharman uly, jazýshy Baýyrjan Momyshulynyń «Ushqan uıa» povesiniń radıonusqasyn tyńdaýǵa shaqyramyz.

Jobanyń jetekshisi - Mahat Sadyq. Mátinin oqyǵan dıktor - Amanjan Eńsebaıuly. Mýzykamen kórkemdegen - Sovethan Meıirhanuly», - dep jazylǵan habarlamada.