QHA-nyń 12 myń múshesi «Rýhanı jańǵyrý» baǵdarlamasyna atsalysyp júr
Bul týraly QHA Tóraǵasynyń orynbasary Darhan Myńbaı málim etti, dep habarlaıdy QazAqparat.
«Rýhanı jańǵyrý» baǵdarlamasy aıasynda 6 negizgi joba men 1100-den astam qosymsha jobalar júzege asyrylyp jatyr. Olardyń barlyǵy qoǵamdyq sanany jańǵyrtý men HHІ ǵasyrda elimizdiń básekege qabilettiligin qamtamasyz etetin salalardy qalyptastyrýǵa baǵyttalǵan. Atalǵan jobalardy júzege asyrýǵa 12 myńnan astam QHA belsendi músheleri atsalysýda. Naqtyraq aıtsaq, olardyń sany - 12641. Onyń 98-i jobalardy basqarsa, 116-sy sarapshy bolyp júr», - dedi D.Myńbaı QR Prezıdenti janyndaǵy Memlekettik basqarý akademııasynda ótken semınar-trenıngtiń ashylýynda.
Sonymen birge, QHA Tóraǵasynyń orynbasary Qazaqstannyń úshinshi jańǵyrýynyń ekonomıkalyq ósimniń jańa modelin qurýǵa jáne jahandyq básekege qabilettilikpen qamtamasyz etýge baǵyttalǵanyn jáne bul oraıda «Rýhanı jańǵyrý» baǵdarlamasynyń erekshe mánge ıe ekenin atap ótti.
«Memleket basshysy aıtqandaı, rýhanı jańǵyrý saıası jáne ekonomıkalyq jańǵyrýdyń naǵyz ózegi bolyp tabylady. Sol sebepti, qoǵamdyq sanany jańǵyrtý memlekettiń, azamattyq qoǵamnyń jáne árbir azamattyń negizgi mindetteriniń birine aınalady. Olardyń saıası, ekonomıkalyq jáne áleýmettik qatynastar júıesin, qoǵamnyń rýhanı ómir salasyn qamtıtyn keń aýqymyna qaramastan, barlyǵy túptep kelgende qaıratty ári jaýapty adamdardyń biregeı ultyn qurýǵa baǵyttalǵan», - dep óz sózin túıindedi D.Myńbaı.
Qazaqstan halqy Assambleıasy qazaqstandyq birlik pen kelisim úlgisiniń mańyzdy bóligi bolyp tabylady. Assambleıa quramynda 1300-den astam etnomádenı birlestikter, 3 myńǵa jýyq qoǵamdyq kelisim keńesteri, 2 myń analar keńesi, 39 dostyq úıi, 14 jýrnalıster klýby jáne 15 tilde aqparat taratatyn 52 BAQ bar. Assambleıa aktıvi respýblıka boıynsha 150 myńnan astam adamdy quraıdy.