QHA músheleri Taýly Qarabaqtaǵy jaǵdaıǵa qatysty málimdeme jasady
«QazAqparat» agenttigi málimdemeniń tolyq mátinin jarııalaıdy.
«Biz, Qazaqstan halqy Assambleıasynyń músheleri Taýly Qarabaqtaǵy jaǵdaıdyń shıelenisýine qatysty alańdaýshylyq bildirip otyrmyz. Buqaralyq aqparat quraldaryndaǵy beıbit turǵyndar arasynda qurbandar bolý múmkindigi týraly aqparatty úreılene qabyldadyq.
Adam ómiri, densaýlyǵy, qarapaıym turǵyndar, sonyń ishinde qart adamdar, áıelder men balalardyń ómirine qaýip tónip turǵanda, máseleni áskerı jolmen sheshýge bolmaıdy dep sanaımyz. Eki tarapty atysty toqtatyp, shıelenisken jaǵdaıdy kelissózder arqyly retteýge shaqyramyz. Qantógiske, adamdardyń qurban bolýyna, úılerdiń qıraýyna jol berilmeýi tıis. Emotsııa adamdar arasyndaǵy beıbitshilik, aqyl-parasat jáne ıgi qatynastarydan joǵary turmaýy tıis.
Qazaqstan ázerbaıjandary men armıandary qazaq jerinde ondaǵan jyldar boıy bir halyqtaı beıbit ómir súrip, bir-birine shynaıy qurmetpen qaraıdy. Biz kez kelgen máseleni ózara kelisim arqyly sheshýge bolatynyn bilemiz jáne solaı isteý kerek dep esepteımiz. Baýyrlarymyzdyń qany tógilip jatqany biz úshin úlken qaıǵy-qasiret.
Biz Qazaqstandaǵy barlyq etnıkalyq toptardyń ókilderin aýyzbirshilik tanytyp, alaýyzdyq pen zorlyqtyń kez kelgen túrine qarsy shyǵýǵa shaqyramyz. Biz bir sáttik emotsııa, teris aqparat, arandatýshylyqqa berilmeýimiz kerek. Bizge qazir Taýly Qarabaqta bolsyn, basqa jerde bolsyn beıbitshilik, meıirim men ózara syılastyq qajet» - delingen málimdemede.
Eske sala keteıik, Ázerbaıjan men Armenııanyń qorǵanys vedomstvolary jeksenbi, 27 qyrkúıek kúni Taýly Qarabaqtaǵy jaǵdaıdyń ýshyǵýy týraly málim etti.
Ázerbaıjan men Armenııa elderinde áskerı tártip jarııalanǵan. Qazaqstan Respýblıkasynyń Syrtqy ister mınıstrligi armıan-ázerbaıjan janjalyna qatysty málimdeme jasady.