QHA memlekettik qyzmetshilerge arnalǵan semınar-trenıng ótkizedi
Atalǵan shara Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda belgilengen mindetter men qoǵamdyq kelisim jáne jalpyulttyq birlik salasyndaǵy memlekettik saıasatty júzege asyrý tehnologııalary boıynsha memlekettik qyzmetshilerdiń kásibı bilimi men biliktilik deńgeıin arttyrý maqsatynda uıymdastyrylǵan.
Respýblıkalyq semınar-trenıngte QHA hatshylyǵynyń, QR Mádenıet jáne sport, Bilim jáne ǵylym, Din isteri jáne azamattyq qoǵam mınıstrlikteriniń, A.Baıtursynov atyndaǵy Til bilimi ınstıtýtynyń ókilderi men Memlekettik basqarý akademııasynyń professor-oqytýshylar quramy tyńdaýshylarǵa dáris oqyp, trenıngter men pikir almasýlar ótkizedi.
«Búgingi sharanyń negizgi úsh maqsaty - memlekettik saıasatty nasıhattaý jáne onyń óńirlerge jetý joldaryn talqylaý, aımaqtardan kelgen ókildermen pikir almasý jáne memlekettik qyzmetshilerdiń biliktiligin kóterý bolatyn. Osyǵan sáıkes, arnaıy baǵdarlama qurylyp, ortalyq pen óńirlerdegi bilim, ǵylym, áleýmettik qyzmet, mádenıet, sport, din sekildi túrli salada jumys isteıtin memlekettik qyzmetshilerdi jınadyq. Tyńdaýshylar aldynda praktıkter de, ǵalymdar da dáris oqıdy. Jetekshi ǵylymı ınstıtýttardan da mamandardy shaqyryp otyrmyz. Olar latyn grafıkasyna kóshý men tarıh salasyndaǵy zertteý jumystarynyń qalaı júrip jatqany týraly tolyq áńgimeleıtin bolady», - deıdi QR Prezıdenti janyndaǵy Memlekettik basqarý akademııasynyń Ortalyq Azııa óńirindegi etnosaralyq jáne konfessııaaralyq qatynastardy retteý ortalyǵynyń jetekshisi, QHA ǵylymı-sarapshylyq keńesiniń tóraǵasy Aıgúl Sádýaqasova.
Uıymdastyrýshylardyń aıtýynsha, semınarǵa barlyq oblystardan, Astana jáne Almaty qalalarynan, jergilikti basqarý memlekettik organdarynan jáne ortalyq memlekettik organdardyń ókilderi jınaldy. Olar Memlekettik basqarý akademııasynyń tyńdaýshylary retinde qabyldanady jáne úshkúndik baǵdarlamany meńgergen soń, arnaıy sertıfıkatqa ıe bolady.