QHA: Qazaqstannyń BUU QK turaqty emes músheligine saılanýy - elimizdiń halyqaralyq joǵary bedeliniń aıshyqty aıǵaǵy
«QazAqparat» HAA quttyqtaý mátinin jarııalaıdy.
Qurmetti otandastar! Sizderdi Qazaqstan halqy Assambleıasy tarıhı oqıǵa - Qazaqstan Respýblıkasynyń alǵash ret Birikken Ulttar Uıymynyń basty organy - Qaýipsizdik Keńesiniń turaqty emes músheligine saılanýymen quttyqtaıdy!
Bizdiń elimiz BUU-nyń Qaýipsizdik Keńesiniń quramyna Ortalyq Azııadan saılanǵan tuńǵysh memleket.
2016 jylǵy 28 maýsymda Nıý-Iorkte BUU Bas Assambleıasy jumysyna 193 memlekettiń qatysýymen ótken daýys berý kezinde Qazaqstanǵa 138 memleket qoldaý kórsetti.
2017 jyldyń 1 qańtarynan bastap 2018 jyldyń 31 jeltoqsanyna deıin Qazaqstan Respýblıkasy Azııa-Tynyq muhıty aımaǵy memleketteri atynan BUU saıası organynyń asa mańyzdy jumysyna resmı túrde qatysatyn bolady, oǵan Uıymnyń Jarǵysymen jahandyq beıbitshilik pen qaýipsizdikti saqtaý boıynsha ókilettikter júkteledi.
Bul - Qazaqstannyń tuńǵysh Prezıdenti, Elbasy Nursultan Ábishuly Nazarbaevtyń beıbitshilik súıgish syndarly syrtqy saıasatynyń jeńisi!
Bul barsha qazaqstandyqtardyń jeńisi!
Qazaqstannyń BUU Qaýipsizdik Keńesine múshe bolyp saılanýy - Qazaqstan Respýblıkasynyń halyqaralyq joǵary bedeliniń aıshyqty aıǵaǵy, onyń halyqaralyq qaýipsizdikti jáne memleketaralyq qatynastardaǵy senim sharalaryn nyǵaıtýǵa qosqan úlesiniń baǵalanýy.
Qarýsyzdaný saıasatynyń etalony bolǵan Qazaqstannyń jáne onyń Kóshbasshysynyń Semeı ıadrolyq polıgonyn jabý, ıadrolyq qarýdan óz erkimen bas tartý bastamashyl beıbitshil ıdeıalary halyqaralyq qoǵamdastyqta qoldaýǵa ıe boldy.
Qazaqstannyń Azııadaǵy ózara is-qımyl jáne senim sharalary jónindegi keńes shaqyrý týraly bastamasy, Eýropadaǵy qaýipsizdik jáne yntymaqtastyq uıymyna tóraǵalyq etýi, Ortalyq Azııada ıadrolyq qarýdan azat aımaq qurý, qaýipsiz jańa álem men ádilettilikke baǵyttalǵan G-global bastamasy Qazaqstandy beıbitshil bastamalar men búkil álemdegi senim atmosferasyn qalyptastyrýshy kóshbasshy retinde tanytty.
Halyqaralyq qoǵamdastyqty ıadrosyz álem qurýǵa, kez kelgen soǵys túrin boldyrmaı, onyń aldyn alýǵa shaqyrǵan AQSh-taǵy ıadrolyq qaýipsizdik jónindegi sammıtte jarııalanǵan Qazaqstan Respýblıkasy Prezıdentiniń «Álem. HHІ ǵasyr» manıfesi BUU-nyń resmı qujatyna aınaldy.
Qazaqstan halqy Assambleıasy asqan rızashylyq sezimin bildire otyryp, Qazaqstan Prezıdenti, Elbasy Nursultan Ábishuly Nazarbaevty, barsha Qazaqstan halqyn Qazaqstannyń kópvektorly halyqaralyq saıasatyndaǵy tarıhı jeńisimen quttyqtaıdy!
Bul jeńis - Ortalyq Azııanyń jáne elimizdiń ár azamatynyń qaýipsizdigin nyǵaıtýdyń kepili!
Qazaqstan halqy Assambleıasynyń Keńesi
Astana q., 2016 jylǵy 29 maýsym