QHA qaıyrymdylyq marafonyna qatysýshylardy «Jomart jan» tósbelgisimen marapattaıdy
«Biz Assambleıanyń qaıyrymdylyq dástúrlerin jalǵastyrýdamyz. Táýelsizdiktiń 30 jyldyǵyna oraı, Assambleıa búgin «Qaıyrymdylyq kerýeni: 30 ıgi is» qaıyrymdylyq marafonyn bastady. Bul jobanyń maqsaty – ózara kómek qundylyqtaryn nasıhattaý, qaıyrymdylyq mádenıetine tárbıeleý, volonterlikti damytý. Qaıyrymdylyq marafony aıasynda 2021 jyly elimizdiń barlyq óńirlerinde birqatar shara ótkizý josparlanǵan. «Jaqsylyq jasa, «Ómir syıla», «Jaqsylyq jasaýǵa keshikpe!», «Júrekten shyqqan alǵys», «Ardagerlerge qurmet» jáne basqa da sharalar kópbalaly jáne az qamtylǵan otbasylardy, ardagerler men qarttardy azyq-túlik sebetterimen, kıimmen jáne dári-dármektermen qamtamasyz etýge jáne basqa da birqatar sharalarǵa baǵyttalǵan», - dedi spıker Táýelsizdiktiń 30 jyldyǵy men Alǵys aıtý kúniniń 5 jyldyǵyna arnalǵan dóńgelek ústelde.
Balalar úıinde tárbıelenýshilerge kóńil bólip, olardy kıimmen, kitaptarmen, oıynshyqtarmen, syılyqtarmen qamtamasyz etý úshin «Balalarǵa mereke syıla», «Balalar úıindegi bir kún», «Balalar - bizdiń bolashaǵymyz» atty kezdesýler ótedi.
Assambleıa «Mekenim – jasyl ormanym», «Taza jaǵalaý» jáne basqa da aktsııalar aıasynda aǵash otyrǵyzýdy, aýmaqty kógaldandyrý men abattandyrýdy jalǵastyrady.
«Biz azamattardyń qoǵamdyq jáne jeke problemalaryna memlekettik organdar men azamattardyń nazaryn aýdarýdy, qaıyrymdylyq jáne volonterlik dástúrlerin tanytýdy jalǵastyramyz. Bıylǵy qarasha aıynda qaıyrymdylyq forýmynda qorytyndy jasap, «Qaıyrymdylyq kerýeni: 30 ıgi is» qaıyrymdylyq marafonyna qatysýshylardy «Jomart jan» tósbelgisimen marapattaımyz. Biz elimizdiń barlyq qaıyrymdylyq qorlarymen jáne volonterlik uıymdarymen yntymaqtastyqty jalǵastyramyz. Búgin, Alǵys aıtý kúni jobany bastap otyrǵanymyz da kezdeısoq emes», - dedi Z. Kýzıev.
Aıta keteıik, Qazaqstan halqy Assambleıasy «Biz birgemiz» aktsııasynda 2 mlrd teńgege jýyq járdem kórsetken.