QHA: Kásipker Oljas Súleımen jastardy álemniń naryǵyn birge jaýlaýǵa shaqyrdy
«Qazaqta «Almas qylysh qyn túbinde jatpaıdy» degen jaqsy sóz bar. Bizdiń elde talpynǵan, eńbektengen adamǵa jetistikke jetýge bolatynyna men tolyqtaı senimdimin! Oǵan dálel retinde qarapaıym jetistikterimmen bólisýge ruqsat etińizder. Elimizdiń arqasynda aýyl balasynyń Qytaı Halyq Respýblıkasyndaǵy eń myqty ýnıversıtetterdiń birinde bilim alsam degen armany oryndaldy. Shetelde oqyp júrgen kezimizde, bizge qarap eldi synaıtyn bolǵandyqtan, 10 myńnan astam stýdenttiń basyn biriktiretin Qazaqstan stýdentter qaýymdastyǵyn qurdyq jáne de Shanhaıdyń tórinen «Qazaqstan mádenıet ortalyǵyn» ashtyq. Toǵyz jyl aspan asty elinde turyp, oqýymdy aman-esen támamdap, «Elimdi qandaı jańalyqpen qýantyp, tańqaldyrsam?» degen oıda júrgenimde BUU uıymdastyrǵan «Kóp Tilder, Bir Álem» shyǵarmalar saıysyna qatystym», - dedi O. Súleımen.
Onyń aıtýynsha, baıqaýda 130 memleketten 23 myńnan astam úmitker qatysqan dodada jeńiske jetti.
«BUU-da bıik minberden sózimdi Sizden (Nursultan Nazarbaevtan) úlgi alyp, ana tilimde bastap, qazaq tilin álemge taǵy bir estirttim. BUU-da elimiz ıadrolyq qarýdan bas tartqany úshin, erekshe qurmetke ıe ekenine kózim jetti. Aýyldyń armanshyl balasy – shetten bilim alyp, halyqaralyq tájirıbe jınap, aman-esen elge oraldym. Kelgen soń mınıstrdiń keńesshisi laýazymynda, taǵy basqa qyzmetterde bolyp, keıin kásipkerlikke bet burdym. Shet elde bilim alǵan dostarymmen birigip «Biz jumys izdemeı, jumys ornyn ashaıyq» degen oımen ózimizdiń kompanııamyzdy qurdyq. Qazirgi kezde kompanııamyz joǵary deńgeıde jumys istep, munaı jáne blokcheın salarynda halyqaralyq deńgeıdegi kompanııalarmen básekege túsýde. Kásipker degenimiz – qazirgi kezdiń jaýyngeri dep oılaımyn. Sebebi, kásipkerlik úlken eńbek pen batyldyqty qajet etedi. Batyldyq pen batyrlyq qanymyzda bolǵan soń, elimizdiń jastary eshkimge táýeldi bolmaı, kásipker bolyp, álemniń naryǵyn birge jaýlaýǵa shaqyramyn! Qazaq jigitteri baı-baqýatty el degende márt, atymtaı jomart bolsa, elimiz budan da úlken jetistikterge jetetinine senimdimin», - dedi Oljas Súleımen.