QHA estafetasynyń nyshany - Taıqazan QR ulttyq mýzeı qoryna tabys etildi (FOTO)
Sondaı-aq, «Qazaqstan» teleradıokorporatsııasy Uly Jeńistiń 70 jyldyǵyna arnalǵan kitaptar toptamasyn mýzeıge syıǵa tartty, dep habarlaıdy «Qazaqstan Respýblıkasynyń Ulttyq mýzeıi» RMQK Aqparattyq-ımıdjdik jumys qyzmeti.
Merekelik shara Ulttyq mýzeıdiń aldyndaǵy alańqaıda kásibı bı ujymdary men eriktilerdiń jáne moberlerden quralǵan 300 adamnyń fleshmobpen bastaldy. Onda Qazaqstannyń qalyptasýy men damýy jáne elimizdegi mýzeı isiniń ótkeni men búgini teatrlandyrylǵan qoıylym arqyly sahnalandy. Qoıylym kezinde Qazaq handyǵynyń tarıhynan syr shertilip, «Máńgilik el» ıdeıasy nasıhattaldy. Saq jaýyngeriniń kıimderin kıgen jastar sap túzep, elge, jerge qorǵan bolýdyń jarqyn úlgisin kórsetti.
«Ulttyq mýzeı 18 mamyrda atalyp ótetin Halyqaralyq mýzeı kúnin bastap ketti. Biz mereke qarsańynda Qazaqstannyń barlyq óńirlerin aralaǵan Taıqazannyń Ulttyq mýzeıge tapsyrylýyn jaqsylyqqa balap otyrmyz. Sebebi Taıqazan - toqshylyq pen molshylyqtyń belgisi», - dedi saltanatty sharanyń ashylýynda Ulttyq mýzeıdiń dırektory Darhan Myńbaı.
Ol bıylǵy jyl Qazaq handyǵynyń 550 jyldyǵy, Jeńistiń 70 jyldyǵy, Konstıtýtsııamyz ben Qazaqstan halqy Assambleıasynyń 20 jyldyǵy sekildi ataýly datalarǵa toly jyl ekenin baıandady.
«Ataýly datalardyń barlyǵy halqymyzdyń birligi men tutastyǵyn nyǵaıtyp, rýhyn bıiktete túsedi. Taıqazannyń Ulttyq mýzeıge Halyqaralyq mýzeı kúni qarsańynda ákelinýiniń máni zor. Óıtkeni, 18 mamyr kúni Ulttyq mýzeıde «Mýzeıdegi tún» atty merekelik shara ótedi. Sol kúni mýzeıge kelgen jurt Taıqazandy kóredi.
Mýzeı - halyqtyń jady. Búginde Ulttyq mýzeı qazaqtyń qasıetti qara shańyraǵyna aınalyp otyr. Biz mýzeıge kelgen adamdarǵa dinaralyq, ultaralyq tatýlyǵymyzdy jáne berekeli el ekenimizdi osyndaǵy eksponattar arqyly kórsetýimiz kerek. Biz osy baǵytta eńbek etip, osy maqsatqa kúsh jumsaýymyzdy aldaǵy ýaqytta da jalǵastyra beremiz», - dedi Ulttyq mýzeı basshysy.
QR Prezıdenti janyndaǵy Qoǵamdyq kelisim respýblıkalyq memlekettik mekemesi dırektorynyń orynbasary Janna Shaımuhanbetova óz sózinde Qazaqstan halqy Assambleıasynyń yntymaq pen yrystyń uıytqysy bolyp otyrǵanyn alǵa tartyp: «Biz halyqaralyq mýzeı kúni qarsańynda «Qazaqstan halqy Assambleıasy - 20 izgi is» estafetasynyń nyshany bolǵan Taıqazandy Ulttyq mýzeıge saqtaýǵa bereıin dep turmyz. Bul nyshan 74 kún boıy elimizdiń túkpir-túkpirin aralap, izgi isterdi jınady. Estafeta kezinde 35 myńnan astam adamǵa kómek kórsetildi. 620 myń adamnyń qatysýymen 2500 ıgi is atqaryldy. Іs-sharalar Uly Otan soǵysynyń ardagerlerin, múmkindigi shekteýli jandardy, balalar úıiniń tárbıelenýshilerin jáne ata-analarynyń qamqorlyǵynsyz qalǵan jandardy qoldaýǵa baǵyttaldy. Osynyń barlyǵy «Máńgilik eldiń» irgesin bekitip, berekesi men birligin arttyrý úshin jasaldy», - dedi.
J.Shaımuhanbetova aıtýynsha, muqtaj jandarǵa kómek kórsetý úshin 2 mıllıardtan astam aqsha jınalǵan. Іs barysynda áleýmettik-mádenı nysandar boı kóterip, qoldanysqa berilgen. 1000-nan asa aǵash otyrǵyzylyp, aımaqtarda patrıottyq aktsııalar uıymdastyrylǵan.
Basqosý barysynda «Qazaqstan» teleradıokorporatsııasy Ulttyq mýzeıge Jeńistiń 70 jyldyǵyna arnalǵan kitaptar toptamasyn syıǵa tartty.
Bul týraly «Qazaqstan» respýblıkalyq teleradıokorporatsııasynyń Basqarma tóraıymy Nurjan Muhametjanova: «Osydan biraz kún buryn Qazaqstan halqy jeńistiń 70 jyldyǵyn toılady. Elbasy, Qazaqstan Qarýly kúshteriniń Bas qolbasshysy Nursultan Nazarbaev jeńis paradyn, áskerı sherýdi qabyldady. Jeńistiń 70 jyldyǵy «Qazaqstan» teleradıokorporatsııasynda da erekshe yqylaspen atalyp ótti. Sonyń bir belgisi retinde biz búgin Ulttyq mýzeıge 4 bólimnen turatyn «Jeńiske taǵzym» dep atalatyn kitaptardy tabystamaqshymyz. Alǵashqy kitap 7 bólimdi derekti fılmnen turady. Onda halqymyzdyń batyr uldary men batyr qyzdarynyń erlikteri baıandalady. 70 derekti fılmnen quralǵan toptamada esimderi men erlikteri eskerýsiz qalǵan qaharmandarymyz jaıly syr shertiledi. Kelesi kitapta Qazaq radıosynyń altyn qorynan alynǵan 20 asqaq daýys áspetteledi. Bul jerden Uly Jeńistiń 20 jyldyǵyna 1965 jyly jazylyp alynǵan Baýyrjan Momyshulynyń, 1930 jyly jazylyp alynǵan Talǵat Bıgeldınovtyń, Qasym Qaısenovtyń jáne taǵy da basqa tanymal tulǵalardyń daýysyn tyńdaýǵa bolady. Al tórtinshi kitapqa maıdannan jazylǵan hattar toptastyryldy», - dep atap ótti.