QHA: Elbasy Joldaýy elimizdiń basty saıası damý qujaty
Otyrys jumysyna Qazaqstan halqy Assambleıasynyń músheleri, ýnıversıtettiń QHA kafedrasynyń oqytýshylary men stýdentteri, sondaı-aq mektep oqýshylary qatysty.
Shara barysynda Joldaýdyń 12 basymdyǵyna ekpin berildi. Olardyń arasynda bıýdjet qyzmetkerleriniń jalaqysyn 1,5 esege kóterý, pedagog mártebesin arttyrý máseleleri bar.
«Elbasy óz qyzmetinde halyqqa barlyǵy 21 Joldaý arnady. Onyń 16-na jeke óz basym Parlament Senatynyń depýtaty retinde tikeleı qatystym. Bıylǵy Joldaý erekshe formatta ótti. Joldaýdyń basty ereksheligi - halyqtyń ál-aýqatyna tereńinen mán berilýi. Odan bólek, Memleket basshysy túrli salalardaǵy bar problemalardy ashyp aıtyp berdi. Prezıdent eldiń ekonomıkasy tikeleı adam kapıtalymen ólshenetinin únemi aıtady. Kezekti Joldaý bunyń dáleli. Kórip otyrǵandaryńyzdaı, basty másele - halyqtyń ál-aýqatyn arttyrý, onyń ishinde bárin tolǵandyratyn - jalaqy máselesi bar. Osy turǵyda Joldaý - ol elimizdiń basty saıası damý qujaty», - dedi L.Gýmılev atyndaǵy EUÝ-niń Qazaqstan halqy Assambleıasy kafedrasynyń meńgerýshisi Anatolıı Bashmakov.
A.Bashmakovtyń aıtýynsha, Elbasynyń dástúrge aınalǵan Joldaýlarynyń jalpy úsh negizgi komponenti bar, aldymen - júıeli bolýy, ekinshiden - el damýyna arnalýy, úshinshiden - turaqtylyq pen baqylaýda ustaý.
«Memleket basshysynyń Joldaýy halyq tarapynan jyly qabyldandy dep oılaımyn. Bul óz kezeginde sabaqtastyqtyń belgisi. Ózim bilim salasynda qyzmet atqaratyn bolǵandyqtan meniń kóńilime qonǵany - bilim berý salasyndaǵy iri ózgertýler, atap aıtqanda, pedagogtyń mártebesin kóterý. Taǵy bir aıtarym, Joldaýdy júzege asyrý bastalyp ketti. Kesheden bastap elimizde kásibı tehnıkalyq bilim berýdiń tegin júıesi engizildi. Bul isti Qazaqstanda 300-den astam kolledj júzege asyryp jatyr. Sonymen qatar JOO-nyń básekege qabiletti bolýy men óz túlekterin jumyspen qamtamasyz etýin jiti qadaǵalaýy - bul ýnıversıtettiń bilim berý sapasyn aıqyndaıtyn kórsetkish», - dedi L.Gýmılev atyndaǵy EUÝ-niń Eýrazııalyq zertteýler kafedrasynyń meńgerýshisi Nurbek Shaıahmetov.
Eske sala keteıik, L.Gýmılev atyndaǵy EUÝ-de Qazaqstan halqy Assambleıasy kafedrasy tikeleı Elbasynyń uıytqy bolýymen 2013 jyldan bastap jumys istep keledi.