QHA Arys turǵyndaryna 65 tonna gýmanıtarlyq kómek jiberdi

ALMATY. QazAqparat - Qazaqstan Halyqtary Assambleıasy búgin Arys qalasynyń turǵyndaryna taǵy 65 tonna gýmanıtarlyq kómek jiberdi, dep habarlaıdy QazAqparat tilshisi.

«Meıirim kerýeni» aktsııasy aıasynda azyq-túlik, qurylys materıaldary tıelgen 9 júk kóligi Almatydan shyǵyp ketti.

Japa shekken turǵyndarǵa kómek qolyn QHA Almaty qalalyq bólimshesiniń músheleri, Uıǵyr etnomádenı ortalyǵynyń músheleri sozdy.

«Munda negizinen qurylys materıaldary. Sebebi, ol jaqta úıler qaıtadan qalpyna keltirilip jatyr. Basynda biz azyq túlik, kıim-keshek jibergen bolatynbyz. Munda tek kásipkerler ǵana emes, barlyq halyq kómektesip jatyr. Zeınetker apamyz 200 teńge jiberip jatyr. Biz úshin bul baǵa jetpes aqsha. Biz Aryspen birgemiz», - dedi QR Parlament Májilisiniń depýtaty, Respýblıkalyq uıǵyr etno mádenı birlestiginiń tóraǵasy Shaımardan Nurymov.

QHA músheleri, ózbek, túrik, uıǵyr, ázerbaıjan, káris, orys, tatar, ýkraın sııaqty ult ókilderi 70 mln teńge shamasynda qarajat jınap berdi.

Olar birinshi kúni-aq 100 tonna júk jiberdi.

Túrkistan oblysynyń qoımalaryna búginde 510 tonna gýmanıtarlyq kómek jınaqtaldy. Shtab jumyskerleri japa shekken turǵyndar arasynda 400 tonna azyq-túlik, kıim-keshek taratyp úlgerdi.

«Túrkistan» áleýmettik damý korporatıvti qorynyń atyna qazaqstandyqtar 1 mlrd 200 mln teńge qarajat aýdardy.

Arystaǵy qoımalarda zattardy urlaý-tonaýdyń aldyn alý úshin arnaıy veb kameralar ornatyldy.