Kezekten tys attestattaýdan kedenshilerdiń 18 paıyzy óte almady - M.Esenbaev
Bul týraly búgin Kedendik baqylaý komıtetiniń tóraǵasy Májıt Esenbaev aıtty.
Onyń atap ótýinshe, attestattaýdan keden organdarynyń 878 qyzmetkeri ótti. Atap aıtqanda, joǵary attestattaýdan komıtettiń basqarýshy quramynyń 40 qyzmetkeri ótip, onyń 28-i atqaryp otyrǵan laýazymdaryna sáıkes dep tanylsa, 5-eýiniń laýazymdary tómendetildi. Sonymen qatar 2-eýine basqa qyzmetke aýysý usynylyp, 5-eýi jumystan bosatyldy.
«Nátıjesinde joǵary attestattaý komıssııasynan keden organdary qyzmetkerleriniń 30 paıyzy ótpeı qaldy», - dedi ol.
Al Ortalyq attestattaýdan komıtettiń quqyq qorǵaý blogynyń 221 qyzmetkeri ótýi tıis edi. Alaıda, 6 qyzmetker attestattaýdan ótýden óz erikterimen bas tartyp, keden organdarynan jumystan ketti. Qorytyndysynda, 15 qyzmetker laýazymdaryna sáıkes dep tanylyp, kadr rezervine alyndy ári joǵary laýazymǵa usynyldy. Sondaı-aq 144-i laýazymdaryna sáıkes bolsa, 8-i laýazymynan tómendetildi. 23-ine basqa qyzmetke aýysý usynylyp, 15-i jumystan bosatyldy. «Nátıjesinde Ortalyq attestattaý komıssııasynan keden organdarynyń 22 paıyzy ótpedi», - dedi M.Esenbaev.
Óńirlik attestattaý komıssııasynan ótýi tıis 640 qyzmetkerdiń 7-eýi óz erikterimen jumystan ketti. 60 qyzmetker laýazymdaryna sáıkes dep tanylyp, kadr rezervine alyndy ári joǵary laýazymǵa usynyldy. 470-i laýazymdaryna sáıkes bolsa, 26-sy laýazymynan tómendetildi. 37-ine basqa qyzmetke aýysý usynylyp, 40-y jumystan bosatyldy.
«Qorytyndysynda, keden organdarynda kezekten tys attestattaýdan 878 qyzmetker ótti. Onyń 717-si - attestattaldy. 161 qyzmetker attestattaýdan ótpedi, onyń ishinde 60 qyzmetker jumystan bosatyldy», - dedi komıtet tóraǵasy.