Kezekte turǵan túrkistandyq 1822 otbasy baspanaly bolady

TÚRKІSTAN. QazAqparat – Túrkistan oblysynda bıylǵy on aıda 492,4 myń sharshy metr baspana paıdalanýǵa berildi. Bul týraly búgin oblys ákimi Ómirzaq Shókeev Ortalyq kommýnıkatsııalar qyzmeti uıymdastyrǵan onlaın-brıfıngide aıtty, dep habarlaıdy QazAqparat tilshisi.

Aımaq basshysynyń aıtýynsha, Túrkistandaǵy kóppáterli turǵyn úılerdiń qasbetteri tutastaı ashyq tústi mármár tas pen travertınmen qaptalýda. Turǵyn úı qurylysy qalanyń ákimshilik-iskerlik ortalyǵynda qarqyn ala túsken. Mundaǵy 7 qabatty 24 turǵyn úı qarasha aıynyń sońynda salynyp bitedi dep josparlanǵan.

«Ipotekalyq turǵyn úılerdiń qatary artyp, jyl sońyna deıin kezekte turǵan 1822 otbasy baspanaly bolady. Basym bóligi turǵyn úıge muqtaj tiziminde tirkelgen kópbalaly otbasylarǵa, bıýdjettik sala qyzmetkerlerine, múmkindigi shekteýli jandar men jetim balalarǵa beriledi», - dedi Ómirzaq Shókeev.

Aımaqta turǵyn úıdi paıdalanýǵa tapsyrý jospary 595,7 myń sharshy metrdi quraıdy. 10 aı ishinde 406,4 myń sharshy metr úı paıdalanýǵa berilgen. 2020 jyly «Nurly jer» baǵdarlamasynyń aıasynda memlekettik bıýdjet esebinen 158 nysannyń qurylysyna 36,6 mlrd teńge bólingen. Jyl qorytyndysy boıynsha 70 nysan paıdalanýǵa tapsyrylmaq.

«Jalpy, oblys boıynsha bıyl 240 bıýdjettik ınvestıtsııalyq joba iske asyrylýda. Bıyl memlekettik jáne ishki ister organdary men bilim berý, densaýlyq saqtaý jáne mádenıet salalaryna tıesili 77 nysannyń qurylysyn aıaqtaý josparlanǵan», - dedi oblys ákimi.