Kezdeısoq zańgerler úshin sot júıesine jol jabyldy - Joǵarǵy sot tóraǵasy
Bul týraly Joǵarǵy sot tóraǵasy Jaqyp Asanov QR Prezıdenti janyndaǵy adam quqyqtary jónindegi komıssııanyń keńeıtilgen májilisinde aıtty.
«Komıssııanyń Joǵarǵy sotta ótýi tegin emes.Adamdardyń quqyǵyn qorǵaý - sot júıesiniń eń negizgi mindeti. Sot protsesterine qatysýshy taraptarǵa jaǵdaı jasaý boıynsha kóptegen ózgerister jasalyp jatyr», - degen Joǵarǵy sottyń tóraǵasy Jaqyp Asanov búginde sot júıesine sapaly maman irikteý reformasynyń ekinshi kezeńi bastalǵanyn atady.
«Buǵan deıin qyzmetke kirisýshi sýdıalardy jańa talap boıynsha qabyldadyq. Meniń jeke pikirim boıynsha, qazir sot júıesinde kareralyq ósý protsesi ádil ótip jatyr. Ony bir ǵana dúnıeden baıqaýǵa bolady. Sońǵy kezde maǵan eshkim ondaı máselemen ótinish aıtpaıtyn boldy. Óıtkeni, meniń qolymnan bireýdi sýdıa etip taǵaıyndaý nemese qyzmette ósirý kelmeıdi. Barlyǵyn arnaıy jasaqtalǵan komıssııa sheshedi. Qazir kezdeısoq zańgerler úshin sot júıesine jol jabyldy dep senimmen aıta alamyn. Endigi másele qyzmet babyndaǵy sýdıalardyń sapasyna qatysty bolyp tur. Júıedegi sýdıalardy osy jyldyń aıaǵynan bastap teksere bastaımyz. Munda da ozyq memleketterdiń tájirıbesine negizdelgen ereje bekitiledi. Tekserýdiń ádil ótýin qadaǵalaıtyn komıssııa quryldy. Onyń jumysyna men aralasa almaımyn. Basqa da áriptesterimniń aralaspaýyn talap etemin. Osylaısha eki jyldyń ishinde júıedegi sýdıalardyń qyzmetine tolyq baǵa beriletin bolady», - dedi Jaqyp Asanov.
Eske salsaq, Memleket basshysy Qasym-Jomart Toqaev Joǵarǵy Sot tóraǵasy Jaqyp Asanovqa sot júıesin jetildirý jumystaryn jalǵastyrýdy tapsyrǵan bolatyn.
Aldaǵy 2,5 jyldyń ishinde sot júıesi laıyq emes kadrlardan tolyq tazartylmaq.