Kezdeısoq tabylǵan arheologııalyq oljalar memleket menshigine ótýi tıis
Usynylǵan ózgeristerde arheologııa eskertkishterine erekshe kóńil bólinip otyr.
QR Mádenıet jáne sport vıtse-mınıstri Asqar Batalovtyń aıtýynsha, Qazaqstanda 25 myńnan astam tarıhı-mádenı eskertkishter tirkelgen, onyń basym bóligi arheologııalyq eskertkishter sanatynda. Qoldanystaǵy Zańda atalǵan baǵyttaǵy normalardyń sany óte az jáne arheologııalyq eskertkishter zańnamalyq turǵyda erekshe qorǵaýǵa muqtaj.
Mınıstrlik ókiliniń aıtýynsha, arheologııa nysandaryn aıryqsha memlekettik menshik dep taný qajet. Bul jeke menshik jerlerdegi eskertkishterdi saqtaýǵa zańnamalyq kepildik bolyp tabylady.
Odan bólek, tarıhı-mádenı mura nysandarynyń biryńǵaı elektrondyq memlekettik tizilimin qurý kerek. Onda tarıhı-mádenı qundy nysandar týraly derekter bazasy, karta jáne qorǵalǵan aımaqtar týraly málimetter bolýy tıis.
Ókiletti organ men jergilikti atqarý organdarynyń ókildikterin shektep, saraptamalyq tujyrymdardy ázirleý, qujattaý jáne ózge de quqyqtardy Memlekettik respýblıkalyq mýzeı-qoryqtarǵa nemese Memlekettik oblystyq eskertkishterdi qorǵaý ınspektsııasyna tabystaǵan jón.
Sonymen birge, mınıstrlik ókilderi kez kelgen arheologııalyq oljanyń memleket menshiginde bolýy tıis ekenin basa aıtty jáne qundy arheologııalyq muralardy kezdeısoq taýyp alǵandarǵa zań júzinde syıaqylar berilýi múmkin ekenin habarlady.
«Memleket qarajatyna júzege asyrylatyn arheologtardyń arnaıy zertteý jumystary zańmen rettelgen, onda tabylǵan oljalar memleket menshigine ótedi. Al kezdeısoq adamdardyń qundy tarıhı oljany taýyp alý jaǵdaıy qazirgi zańnamada qarastyrylmaǵan. Tabylǵan oljalardyń barlyǵy mádenı qundylyq bolyp sanalatyndyqtan, kez kelgen arheologııalyq oljanyń zań júzinde memleket menshiginde bolǵanyn qalaımyz. Zańǵa engiziletin jańa ózgeristerde kezdeısoq tabylǵan qundy arheologııalyq oljany memleketke ótkizýdiń tolyq tártibin bekitý kózdelip otyr. Tapqan adamǵa oljanyń paıyzdyq bóligin aqshalaı berý máselesi de qarastyrylyp jatyr», - dep túsindirdi Mádenıet jáne sport mınıstrligi Zań qyzmeti departamentiniń dırektory Kúmis Seıilova.
Deparatment dırektory tabylǵan oljany qasaqana memleketke ótkizbegen jaǵdaıda ákimshilik sharalar qoldanylýy múmkin ekenin atap ótti.
Aıta keteıik, qazirgi «Tarıhı-mádenı mura obektilerin qorǵaý jáne paıdalaný týraly» QR Zańy 1992 jyldyń 2 shildesinde qabyldanǵan. Atalǵan zańdy jetildirý maqsatynda oǵan 2007, 2015 jáne 2017 jyldary túzetýler engizilgen.
Mádenıet jáne sport vıtse-mınıstriniń aıtýynsha, qoǵamda oryn alyp jatqan qarqyndy ózgerister qoldanystaǵy zańnyń kóptegen qaǵıdalarynyń eskirýine ákep soqqan.