Kez kelgen tutynýshy satýshynyń medıtsınalyq kitapshasyn suraýǵa quqyly - Jandarbek Bekshın

ASTANA. QazAqparat - QR Densaýlyq saqtaý mınıstrligi Qoǵamdyq Densaýlyq saqtaý komıtetiniń tóraǵasy - Qazaqstannyń bas sanıtary Jandarbek Bekshın Naýryz meıramynda taǵamnan ýlanýdyń aldyn alý týraly keńes berdi, dep habarlaıdy QazAqparat tilshisi.

Onyń aıýynsha, byltyr elimizdegi qoǵamdyq oryndarda tamaqtan ýlanýdyń 15 jaǵdaıy tirkelgen. Úıde daıyndalǵan taǵamnan 6 adam ýlanǵan.

«Mereke kúnderi tabys tabýdy kózdeıtin «kezdeısoq» kásipkerler bolady. Esh qujatsyz, belgisiz jaǵdaıda, belgisiz adamdar ázirlegen taǵamdar óte qaýipti. Bul týraly departamentterge habar berý qajet. Odan bólek, kremdi-kondıterlik ónimderdiń jyly jerde saqtalǵanyn kórseńiz, satyp almańyz. Arzan baǵada tamaq ónimderi satylsa da, ónimniń saqtalý merzimin muqııat zerdeleńiz, sebebi jaramdylyq merziminiń bitýine 2-3 kún qalýy múmkin», - dedi Jandarbek Bekshın Astanada ótken baspasóz máslıhatynda.

Sonymen birge, bas sanıtarlyq dáriger kez kelgen tutynýshynyń satýshydan tıisti qujattardy talap etýge quqyly ekenin eske saldy.

«Satýshynyń jeke medıtsınalyq kitapshasyn, ónimniń qujattaryn suratýǵa, ózińizge qandaı kásiporynnyń qyzmet kórsetetin naqtylaýǵa tolyq quqylysyz. Eger narazylyǵyńyz bolsa, Qoǵamdyq densaýlyq saqtaý komıtetiniń aýmaqtyq bólimshelerine nemese PD mamandaryna júginińiz», - dep keńes berdi Jandarbek Bekshın.