Kez kelgen HQKO-da tólqujat aýystyrýǵa múmkindik bar

ASTANA. QazAqparat - Endi Astana, Almaty jáne Shymkent turǵyndary pasport pen jeke kýálikti aýystyrý boıynsha turǵylyqty mekenjaıynan tys kez kelgen Halyqqa qyzmet kórsetý ortalyǵynyń qyzmetin paıdalana alady, dep habarlaıdy «QazAqparat» HAA tilshisi «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamynyń basqarma tóraǵasy Abylaıhan Ospanovqa silteme jasap.

«Áleýmettik jelilerde halyqtyń kópshiligi Astanaǵa, Almatyǵa nemese Shymkentke ózge qalalardan kelgen adamdardyń kez kelgen HQKO qyzmetin paıdalana alatynyn, biraq sol úsh qala turǵyndarynyń ózderi tirkelgen aýdandaǵy bir ǵana HQKO-ǵa baratyndaryn aıtyp, narazylyq bildirýde. Máselen, siz Aqtóbede tirkeýge turyp, jeke kýálikti Astanada alǵyńyz kelse, kez kelgen HQKO-ǵa bara alasyz. El aýmaǵyndaǵy «Eksterrıtorıaldyq ustanymdy» 2014 jyldyń kókteminde engizip qoıǵanbyz.  Al Astananyń Esil aýdanynda tirkelgen turǵyn Saryarqa aýdanynyń HQKO-yna bara almaıdy.  Keńseler jumysynyń kóptiginen ol turǵyn tek qana Esil aýdanynyń HQKO-yna barýy tıis boldy», - dep jazdy ol áleýmettik jelide.

«Bul máseleni kóshi-qon polıtsııasymen birlese otyryp qol alyp, nátıjege qol jetkizdik! Endi «eksterrıtorıaldyq ustanym» Astana, Almaty jáne Shymkent qalalaryna engiziledi - bul úsh qalanyń turǵyndary pasport pen jeke kýálikti aýystyrý boıynsha turǵylyqty mekenjaıynan tys kez kelgen Halyqqa qyzmet kórsetý ortalyǵynyń qyzmetin paıdalana alady», - dep habarlady A.Ospanov.