Kez kelgen baǵdarlama birinshi kezekte halyqtyń tabysyn arttyrýǵa baǵyttalýy tıis - Álıhan Smaıylov
«Atameken» palatasy maroderlikten zardap shekken bıznes sýbektileriniń tizilimin jasady. Jappaı tártipsizdikter saldaryn joıý jónindegi úkimettik jáne óńirlik komıssııalar jumysyn aıaqtaǵannan keıin respýblıkalyq jáne jergilikti bıýdjetterden shyǵyndy óteý úshin tıisti qarajat bólinedi. Sonymen qatar bızneske túsken aýyrtpalyqty azaıtý úshin 2022 jylǵy 1 aqpanǵa deıin memlekettik kiris organdarynyń salyqtyq jáne kedendik tekserýleri men kameraldyq baqylaý habarlamalaryn berý ýaqytsha toqtatylady», - dedi Á. Smaıylov.
Onyń aıtýynsha, «Atameken» palatasymen birge Halyqtyń tabysyn arttyrý baǵdarlamasyn ázirlep, qabyldaý josparlanyp otyr.
«Biz úshin eń basty maqsat – halyqtyń tabysyn arttyrý. Kez kelgen jospar, kez kelgen baǵdarlama birinshi kezekte, halyqtyń tabysyn arttyrýǵa baǵyttalýy tıis. Basqarýdyń barlyq deńgeıinde jumystyń tıimdiligi dál osy kórsetkish boıynsha baǵalanatyn bolady», - dedi Úkimet basshysy.
Onyń sózine qaraǵanda, jastar arasyndaǵy jumyssyzdyq deńgeıin tómendetý úshin «Jastar praktıkasy» jáne «Alǵashqy jumys orny» jobalary aıasynda jalaqy mólsheri men jobalarǵa qatysý merzimi ulǵaıady. «Qazaqstan halqyna» qoǵamdyq áleýmettik qory muqtaj balalarǵa zamanaýı jáne qymbat turatyn medıtsınalyq qyzmetter men dári-dármekterdi alýyna múmkindik beredi.
«Jalpy bul Jospardyń iske asyrylýy qańtar oqıǵalarynan keıin eldegi áleýmettik-ekonomıkalyq jaǵdaıdy jedel qalypqa keltirýdi qamtamasyz etedi. Memlekettik organdardyń birinshi basshylary men ákimderge atalǵan Jospardaǵy is-sharalardyń oryndalýyn jeke baqylaýǵa alýdy tapsyramyn», - dedi Premer-Mınıstr.
Budan buryn habarlanǵandaı, búgin Úkimet otyrysynda Ulttyq ekonomıka mınıstri Álibek Qýantyrov «Qazaqstan Respýblıkasyndaǵy áleýmettik-ekonomıkalyq jaǵdaıdy turaqtandyrý jónindegi jedel is-qımyldar josparyn bekitý týraly» QR Úkimeti qaýlysynyń jobasyn tanystyryldy. Talqylaýdan keıin qujat jobasy bekitildi.