Keıingi jyldary elimizde 400-den astam bala tamaqtan ýlandy

<p>Senator Aqmaral Álnazarova Premer-Mınıstr Álıhan Smaıylovtyń atyna joldaǵan depýtattyq saýalynda mektepterde balalarǵa beriletin tamaqqa qatysty máseleni kóterdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Senatordyń aıtýynsha, qazaqstandyq balalardyń arasynda anemııa taralýy 58 paıyzǵa jetken, A dárýmeniniń tapshylyǵy – 23%. Balalar arasynda juqpaly emes sozylmaly aýrýdyń kóbeıýi baıqalyp otyr.

«Bilim berý mekemelerinde tamaqtanýǵa baılanysty syrqatqa alyp kelgen jaǵdaılar kóbeıgen. 2020 jyldan beri mektep jasyndaǵy 425 bala tamaqtan ýlaný saldarynan zardap shekti. Negizgi sebepter retinde ashana qyzmetkerleri arasynda ishek ınfektsııasynyń bolýy, medıtsınalyq tekserýden ótý týraly qujattardy qoldan jasaý, obektide sanıtarlyq-epıdemıologııalyq qorytyndynyń bolmaýy, azyq-túlikti saqtaý jáne ótkizý sharttarynyń buzylý jaǵdaıy anyqtaldy. Búginde elimizde 7 381 mektep jumys istep tur. Kún saıyn bir jarym mıllıonnan astam bala tamaqtanady jáne olardyń sany kóbeıip keledi. Sondyqtan balalardyń qaýipsizdigi men densaýlyǵyn qamtamasyz etý sharalaryn kúsheıtý kerek», - dedi A. Álnazarova.

Sonymen qatar depýtat mektepterdiń 20 paıyzynda ǵana biryńǵaı tamaqtandyrýdy uıymdastyrýdyń qoldanystaǵy standarttary júzege asqanyn atap ótti. Qazirgi kezeńde ártúrli jastaǵy oqýshylardy tamaqtandyrýǵa arnalǵan mázirdi qalyptastyrýda birkelki ádisnama joq.

«Árbir úshinshi mektep ashanasynda kásibı bilimi joq aspazdar jumys istep jatyr. Bilim berý uıymdarynda taza aýyz sýǵa qol jetkizý áli de problema kúıinde qalyp otyr. Mektep oqýshylarynyń 68 paıyzy úıden sý ákeledi, shamamen 30 paıyzy mektepte sý satyp alady. Mektepte aýyz sýmen qamtamasyz etý balalardyń qantty sýsyndardy ishýin azaıtady», - dedi senator.

Aıta keteıik, bıyl jańa oqý jylynan bastap 1-4 synyptaǵy barlyq oqýshyǵa tegin ystyq tamaq berilip jatyr.