Keıingi 3 jylda balalar múgedektigi 11,4%-ǵa ósken - Svetlana Jaqypova

<p>ASTANA. KAZINFORM &ndash; Qazaqstanda keıingi 3 jyl ishinde múgedek balalardyń kórsetkishi 11,4%-ǵa ósýi baıqalady. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti.</p>

«Elimizde 732 myń múgedek jan bar, bul jalpy halyqtyń 3,6% quraıdy. Onyń ishinde 57% eńbekke qabiletti jastaǵy adamdar, 27% zeınetker jáne 15% balalar. Múgedek jandardyń nozologııalyq formalarynyń qurylymy boıynsha kámelet jasyna tolǵan psıhıkalyq buzylýlar, qan aınalymy júıesiniń aýrýlary jáne jaraqat alý jaıttary bar. Al balalar múgedektigi boıynsha júıke júıesiniń aýrýlary, týa bitken aqaýlar jáne psıhıkalyq buzylýlar kóbirek kezdesedi. Taldaý jumystary kórsetkendeı, sońǵy 3 jylda balalar múgedektiginiń 11,4%-ǵa ósýi baıqalady», - dedi Svetlana Jaqypova Úkimet otyrysynda.

Mınıstrdiń aıtýynsha, negizinen 7 men 18 jastaǵy balalar múgedektik kórsetkishi joǵary.

«Halyqaralyq arenada Qazaqstan múgedekterdiń quqyqtary týraly konventsııany ratıfıkatsııalaı otyryp jáne Birikken Ulttar Uıymynyń 2030 jylǵa deıingi turaqty damý salasyndaǵy kún tártibine qosylyp, adam quqyqtaryna negizdelgen saıasatty belsendi iske asyryp keledi. Byltyr maýsymda konventsııaǵa fakýltatıvtik hattama ratıfıkatsııalandy», - deıdi ol.

Osyǵan deıin elimizde 203 myń múmkindigi shekteýli bala tirkelgeni týraly jazdyq.