Keıingi bes jylda psıhıkalyq dertke shaldyqqan balalar sany 1,7 ese artty

ASTANA. QazAqparat – Týa bitken aýrý saldarynan balalardyń 32,5 paıyzy múgedek bolady. Mundaı derekter Ashyq NQA portalynda jarııalanǵan ana men bala densaýlyǵyn saqtaý qyzmetin damytý jónindegi 2024-2030 jyldarǵa arnalǵan «Árbir áıel - árbir bala» tujyrymdamasynda kórsetilgen, dep habarlaıdy QazAqparat tilshisi.

«Sońǵy 5 jylda aýtızmdi qosa alǵanda, psıhıkalyq damýy buzylǵan balalardy bastapqy anyqtaý sanynyń 1,7 esege artqany baıqalady. Aıta ketý kerek, erte dıagnostıka medıtsınalyq-sanıtarııalyq alǵashqy kómek uıymdarynda júrgizilýi kerek. Bul rette psıhıkalyq densaýlyq máselelerimen aınalysatyn mamandardyń saýattylyǵyn arttyrý mańyzdy», - dep jazylǵan tujyrymdama-jobasynda.

Densaýlyq saqtaý mınıstrligi 2017-2021 jyldarda balalardyń arasynda múgedektikke ákep soqqan aýrýlarǵa taldaý júrgizgen.

«Taldaý kórsetkendeı, jetekshi oryndy týa bitken damý aqaýlary (30,3%-32,5% aralyǵynda), júıke júıesi aýrýlary 2-orynda (21,7%- 23,7% aralyǵynda), 3-orynda psıhıkalyq dertter (11,1%-17% aralyǵynda) jáne endokrındik aýrýlar (4,8%-6,4% aralyǵyndy). Bul jaǵdaıǵa yqpal etetin faktorlardyń biri - shala týǵan nárestelerdi tiri alyp qalýǵa múmkindik beretin medıtsınanyń qazirgi damý deńgeıi», - delingen mınıstrlik derekterinde.