Keıingi bes jylda órt pen sýǵa ketý saldarynan 776 bala kóz jumdy

ASTANA. QazAqparat – Jyl basynan beri elimizde órt pen ıis tıip ýlanýdan 14 bala kóz jumdy, al 3 bala sýǵa ketti. Bul týraly Tótenshe jaǵdaılar mınıstrligi Órtke qarsy qyzmet komıtetiniń tóraǵasy Nurbolat Derbisov aıtty, dep habarlaıdy QazAqparat tilshisi.

«Keıingi bes jylda el aýmaǵynda órt, ıis tıip ýlanýdan jáne sýǵa ketý saldarynan 776 bala qaıtys boldy. Tek 2022 jyly órtten ári ıis tııýden 38 bala kóz jumyp, 77 bala sýǵa batyp ketti», - dedi N. Derbisov Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.

Onyń aıtýynsha, bıyl órt pen ıis tıip ýlanýdan 14 bala kóz jumdy, al 3 bala sýǵa ketti.

«Kóp jaǵdaıda mektepke deıingi jáne bastaýysh synyptarda oqıtyn balalar órttiń qaýipti faktorlarynan mert bolyp jatyr», - dedi komıtet basshysy.

Budan buryn habarlanǵandaı, jyl basynan beri órt qaýipsizdigine qatysty 5 myńnan astam bilim berý nysany tekserildi.