Keıingi bes jylda bıýdjetke 30 trıllıon teńge kem túsken – Memleket basshysy

ASTANA. QazAqparat – Sońǵy bes jylda bıýdjetke 30 trıllıon teńge kem túsken. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Makroekonomıkalyq saıasatty óte baıypty júrgizý kerek. Bıýdjet tapshylyǵyn, memleket qaryzyn, Ulttyq qordan aýdarylatyn transfertti jáne basqa da makrokórsetkishterdi retteý qajet. Iá, ekonomıkamyz ósip jatyr», - dedi Prezıdent.

Memleket basshysy biraq salyq túsimderiniń ishki jalpy ónimge qatysty ósý qarqyny turaqsyz ekenin basa aıtty.

«Keıbir mamandar «Salyq jeńildikteri óte kóp bolǵan soń, túsim azaıyp jatyr» deıdi. Budan basqa da sebepter aıtylady. Jalpy, sońǵy bes jylda bıýdjetke 30 trıllıon teńge kem túsken. Árıne bul tsıfrdyń durys-burystyǵyn tekserý qajet. Talaı jyldan beri jalǵasyp kele jatqan osy máseleni túpkilikti sheshetin ýaqyt jetti», - dedi Qasym-Jomart Toqaev.