Keıingi 5 jylda Túrkistan oblysynda 4 420 otbasy kommýnaldyq baspanaǵa ıe bolǵan

ASTANA. QazAqparat – Keıingi 5 jylda Túrkistan oblysynda 4 420 otbasy kommýnaldyq baspanaǵa ıe bolǵan. Ortalyq kommýnıkatsııalar qyzmetinde ótken brıfıngide aımaq basshysy Darhan Satybaldy osyndaı derek aıtty, dep habarlaıdy QazAqparat tilshisi.

«Túrkistan óńirinde qurylys salasy qarqyndy damyp keledi. 5 jylda kólemi qurylys kólemi 2,5 ese ósip, 351 mlrd teńgeni qurady. Paıdalanýǵa tapsyrylǵan turǵyn úı alańy 2 ese kóbeıip, 864 myń sharshy metrge jetti. 5 jylda 4 420 otbasy kommýnaldyq baspanamen qamtyldy. «7-20-25» baǵdarlamasy jáne «Otbasy bank» arqyly 5000-nan astam otbasy áleýmettik-ıpotekalyq úı satyp aldy», - dedi ol.

Sondaı-aq, ákim óńirdegi 2 000-nan astam otbasy jalǵa alǵan baspana aqysyna sýbsıdııa alǵanyn atap ótti.

«221 kóppáterli úıge kúrdeli jóndeý júrgizildi. Túrkistan oblysynda bıyl 205 myń sharshy metr úı tapsyryldy. Jyl sońyna deıin jalpy alańy 211 myń sharshy bolatyn metr 65 kópqabatty úıdi tapsyrý josparlanýda. Nátıjesinde 3557 otbasy óz baspanasyna qol jetkizedi», - dedi Darhan Satybaldy.