Keıingi 4 jylda Qazaqstan shetelge 1,9 mlrd dollardyń kóligin eksporttady

ASTANA. QazAqparat – 2017-2021 jyldary Qazaqstanda jasalǵan kólikterdiń eksport 3 ese artyp, 1,9 mlrd dollarǵa jetti. Bul týraly Ashyq NQA portalynda jarııalanǵan mashına jasaý salasyn damytýdyń 4 jyldyq keshendi josparynda jazylǵan, dep habarlaıdy QazAqparat tilshisi.

«2017-2021 jyldary mashına jasaý salasynda óndiris nomınaldy mánde 2,2 esege ósip, 2,4 trln teńgege deıin ulǵaıdy. Onyń ishinde avtomobıl jasaý sektoryna 715 mlrd teńge, mashına jasaýdyń qalǵan sektorlaryna 1 671 mlrd teńge tıesili. Eksport 3 ese artyp, 1,9 mlrd dollar boldy. El ekonomıkasyndaǵy mashına jasaý salasynyń úlesi 1%-dan 1,5%-ǵa deıin, óńdeýshi ónerkásipke 8%-dan 11%-ǵa deıin ulǵaıdy», - delingen keshendi jospardaǵy qazirgi jaǵdaıǵa jasalǵan taldaý derekterinde.

Elimizde 3 myńnan astam mashına jasaý kásiporny jumys isteıdi. Olarda 115 myńǵa jýyq adam eńbek etip keledi.

«2021 jyldyń qorytyndysy boıynsha mashına jasaý salasynyń eńbek ónimdiligi bir qyzmetkerge shaqqanda 25,7 myń dollardy qurady. Salanyń negizgi kapıtalyna 150 mln dollardan astam ınvestıtsııa salyndy. 245 mln dollardan asa tikeleı sheteldik ınvestıtsııa tartyldy», - dep kórsetilgen jospar jobasynda.

Buǵan deıin habarlaǵanymyzdaı, Qazaqstandaǵy mashına jasaý salasyn damytýdyń 2024-2028 jyldarǵa arnalǵan keshendi jospary bekitilmek.