Keıbir jeke mektepter jabylýdyń az-aq aldynda tur — Aımaǵambetov

<p>ASTANA. KAZINFORM &mdash; Memlekettik tapsyryspen jumys isteıtin jeke mektepterdi qarjylandyrý keshiktirilýde. Qazirgi tańda keminde 80 mlrd teńgege jýyq qarajat jetispeıdi.</p>

Bul týraly Májilis depýtaty Ashat Aımaǵambetov Telegram-daǵy arnasynda habarlady. 

— Birneshe jyl buryn Qazaqstanda jekemenshik mektepterdiń sany nebári 25-30 ǵana bolatyn. Búgingi kúni olardyń sany 800-den asty. Bul — Bilim jáne ǵylym mınıstrliginiń (Oqý-aǵartý mınıstrligi — red.) memlekettik tapsyrys pen jan basyna qarjylandyrýdy engizgen maqsatty saıasatynyń nátıjesi. Osylaısha, jeke mektepter jelisi tez damyp, memleket mektepterdegi úsh aýysymdylyq máselesin, ásirese ońtústik óńirler men iri qalalarda, sheshýge múmkindik aldy. Júzdegen myń jańa oqýshy orny qurylyp, júzdegen memlekettik mektepter úsh aýysymdylyqtan qutyldy. Muny joqqa shyǵarý múmkin emes, — deıdi depýtat.

Onyń aıtýynsha, jeke mektepterge ártúrli kózqaras bolýy múmkin. Alaıda mektepter arasynda alternatıva men básekelestiktiń bolýy jalpy júıe úshin paıdaly. 

— Qazir jeke mektepterdiń damýy alańdaýshylyq týdyryp otyr. Kóptegen mektepter, ásirese ata-analardan qosymsha qarajat almaı, tek memlekettik tapsyrys esebinen jumys isteıtinderi bankrot bolýdyń az-aq aldynda tur. Nelikten? Óıtkeni memlekettik qarjylandyrý úlken keshigýlermen túsedi. Bul tek esep berý qujattaryndaǵy sandar emes — bul muǵalimderdiń jalaqysy, kommýnaldyq qyzmetter, salyqtar. Onyń ústine, kóptegen mektepter 2023 jáne 2024 jyldarǵa arnalǵan qarjylandyrýdy áli kúnge deıin tolyǵymen almady. Bul másele jekemenshik mektepterdiń jumyskerlerimen bolǵan kezdesýde ashyq kóterildi, óıtkeni turaqty qarjylandyrýsyz mektepterdiń qalypty jumys isteýi múmkin emes. Bıyl jaǵdaı odan ári nasharlaýy yqtımal, — deıdi Ashat Aımaǵambetov.

Depýtattyń aıtýynsha, jeke mektepterdi qarjylandyrý respýblıkalyq bıýdjetten jergilikti bıýdjetke berilgen. Alaıda barlyq ákimdikter bul ózgerister týraly bilip, tıisti qarjylandyrýdy tolyǵymen bólmegen. 

— Qazirgi tańda keminde 80 mlrd teńgege jýyq qarajat jetispeıdi. Jaqyn arada bul másele sheshilip, mektepterdiń úzdiksiz qarjylandyrylýy qamtamasyz etiledi dep úmittenemin, — dep túıdi sózin Májilis depýtaty.

Aıta keteıik, buǵan deıin jeke mektepterde oqıtyn áleýmettik osal otbasylardan shyqqan balalarǵa kómek beriletini jaıly jazǵan edik.