Keıbir adamdardyń MÁMS-ke jarnasyn ákimdikter qarajaty esebinen tóleý qarastyrylyp jatyr

<p>ASTANA. KAZINFORM &mdash; QR Densaýlyq saqtaý mınıstrligi medıtsınalyq saqtandyrýdan tys qalǵan halyqtyń bir bóligin qamtýǵa qatysty túsinik berdi. Sebebi osy adamdar skrınıng, medıtsınalyq tekserýmen qamtylmaı otyr.</p>

«Memleket basshysynyń tapsyrmasy boıynsha azamattardy medıtsınalyq saqtandyrýmen qamtý jóninde jumystar atqarylyp jatyr. Osyǵan baılanysty saqtandyrylmaǵan azamattardy tartýda jergilikti atqarýshy organdardyń qatysýyn qarastyratyn birqatar normatıvtik-quqyqtyq aktilerge túzetýler ázirlendi. ıAǵnı azamattardyń jekelegen sanattary úshin MÁMS-ke jarnany oblystardyń, respýblıkalyq mańyzdaǵy qalalar men elorda ákimdikteriniń qarajattary esebinen tóleý máselesi qarastyrylyp otyr. Saqtandyrylmaǵan adamdar úshin tegin medıtsınalyq kómektiń kepildik berilgen kólemi aıasynda medıtsınalyq kómek qoljetimdi bolyp qalady», - delingen mınıstrliktiń Kazinform agenttigine bergen jaýabynda.

Tegin medıtsınalyq kómektiń kepildik berilgen kólemi sheńberine mynalar:

- jedel medıtsınalyq kómek;

- emhana qyzmetteri jáne pallıatıvtik kútim;

- shuǵyl kómek (jaralaný, ýlaný jáne t. b.);

- zerthanalyq taldaýlar (jalpy taldaýlar, AITV jáne týberkýlez dıagnostıkasy);

- sozylmaly jáne áleýmettik mańyzy bar aýrýlardy emdeý;

- dári-dármekpen qamtamasyz etý (dıagnozdyń jekelegen túrleri) kiredi.

«Bul rette, saqtandyrylmaǵan azamattardyń sanyn azaıtý úshin Qazaqstan Respýblıkasy Densaýlyq saqtaý mınıstriniń m.a. 2023 jylǵy 1 jeltoqsandaǵy №703 buıryǵymen halyqty MÁMS júıesine tartý jónindegi jobalaý toby quryldy. Premer-Mınıstr orynbasarynyń tapsyrmasy boıynsha oblystyq jáne aýdandyq deńgeıdegi saqtandyrylmaǵan adamdardy MÁMS júıesine tartý jónindegi shtabtardyń jumysy uıymdastyryldy. Respýblıkalyq deńgeıde Densaýlyq saqtaý birinshi vıtse-mınıstriniń basshylyǵymen jobalyq keńse quryldy. Qor jumys júrgizý úshin apta saıyn saqtandyrylmaǵan azamattardyń tizimin beredi», - dep atalyp ótken vedomstvo aqparatynda.

Óńirlik shtabtar algorıtmge sáıkes jumystardyń oryndalýyn qamtamasyz etedi.

1) oblystyq deńgeıde:

- saqtandyrylmaǵan tizimderdi aýdandyq shtabtarǵa jiberý;

- jumyspen qamtý sharalarymen qamtý;

- jumyssyz retinde esepke qoıý;

- jergilikti bıýdjetten C, D, E sanattaǵy tulǵalardy qarjylandyrý boıynsha máselelerdi pysyqtaý;

- Óńirlik shtab jumysynyń barysy týraly apta saıyn aqparat berý.

2) qalalyq jáne aýdandyq deńgeıde:

- halyqty resmı jumyspen qamtýǵa tartý;

- kásipkerlik qyzmetti tirkeý;

- turǵyndardy jeńildikti sanatqa qosý;

- jumyspen qamtý máselesi boıynsha aqparattyq júıege derekterdi engizý (hr.enbek.kz);

- Óńirlik shtabqa málimetterdi usyný.

Eske salsaq, byltyr kúzde medıtsınalyq qyzmetke júginýge májbúr 3 mln-nan astam adam saqtandyrý júıesinen tys qalǵany málim boldy.

Sol kezde mınıstrlik aýyldardaǵy 1,5 mln adamdy medıtsınalyq saqtandyrý bıýdjet esebinen bolatynyn habarlady.