Keıbir sottarda sýdıalar normatıvten artyq jumys istep jatyr - Qaırat Mámı
«Jekelegen sottardaǵy jumystyń júktemesi óte aýyr. Normatıv boıynsha aıyna 24 is qaraý kerek bolsa, keıbir sottarda bir sýdıaǵa onyń deńgeıi 56-60-qa deıin jetip jatyr», - dedi Q. Mámı.
Sonymen qatar ol Elbasynyń tikeleı nusqaýymen sýdıalardyń jumysyn jeńildetý úshin qosymsha 450 birlik sýdıa shtaty qosylǵanymen, áli de júktelemeler óte kóp ekenin atap ótti.
Aıta keteıik, búgin Joǵarǵy Sotta oblystyq, aýdandyq jáne oǵan teńestirilgen sottyń jumysyn úzdik uıymdastyrý boıynsha 2014 jylǵa arnalǵan respýblıkalyq baıqaýdyń jeńimpazdary marapattaldy. Baıqaý qorytyndysy boıynsha aýdandyq sottar arasynda birinshi oryndy Shyǵys Qazaqstan oblysynyń Semeı qalalyq soty, ekinshi oryndy Qaraǵandy oblysynyń Balqash qalalyq soty ıelendi. Al Mańǵystaý oblysynyń Aqtaý qalalyq soty men Aqmola oblysynyń Bulandy aýdandyq soty úshinshi oryndy ózara bólisti.
Oblystyq jáne oǵan teńestirilgen sottardyń arasynda birinshi oryndy Soltústik Qazaqstan oblystyq soty, ekinshi oryndy Jambyl oblystyq soty, úshinshi oryndy Pavlodar oblystyq soty ıelendi.