Keıbir óńirdegi JEO-lardyń jaǵdaıy syn kótermeıdi – Energetıka mınıstri

ASTANA. QazAqparat – Keıbir óńirdegi jylý elektr ortalyqtarynyń jaı-kúıi syn kótermeıdi. Bul týraly Úkimet otyrysynan keıin Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Keıbir óńirdegi jylý elektr ortalyqtarynyń jaı-kúıi syn kótermeıdi. Erekshe, onyń ishinde Úkimettik deńgeıde nazar aýdarýdy talap etetin JEO toby anyqtaldy. Atalǵan JEO-lardyń tehnıkalyq jaı-kúıin, tótenshe jaǵdaılarǵa táýekelin, stansalardyń paıdalanylýyn eskere otyryp, olardy jóndeý úshin qarjylandyrýǵa Úkimet rezervinen qarajat bólý máselesi de qarastyrylyp jatyr», - dedi mınıstr BAQ ókilderiniń saýalyna oraı.

Sonymen qatar ol qaı óńirdegi jyl elektr ortalyǵynyń jaǵdaıy óte múshkil ekendigin de aıtty.

«Olar eń aldymen Rıdder, odan keıin Ekibastuz, Temirtaý jylý elektr ortalyqtary. Qazir Úkimettiń de, jergilik bılik organdarynyń da jumysy aldaǵy jylý berý maýsymynda barlyq táýekeldi tómendetý úshin qysqa daıyndyq aıasynda qajetti jumys kólemin oryndaýǵa baǵyttalyp otyr», - dedi Almasadam Sátqalıev.