Keıbir medıtsınalyq qyzmetterdiń baǵasy qymbattamaq

ASTANA. QazAqparat – Densaýlyq saqtaý mınıstrligi Medıtsınalyq saqtandyrý qorymen birlesip, em-shara qyzmetterin qarjylandyrýǵa qatysty birqatar sheshimder qabyldady, dep habarlaıdy QazAqparat tilshisi.

Mınıstrlik málimetinshe, halyq konsýltatsııalyq-dıagnostıkalyq kómekke kóp júginedi. ıAǵnı, medıtsınalyq uıymdarǵa túsetin júkteme artyp otyr. Sondyqtan, qabyldaý múmkin bolmaǵan jaǵdaıda patsıentterdiń 80%-ǵa jýyǵy jeke medıtsına ortalyqtaryna jiberiledi.

«Bul medıtsınalyq saqtandyrý qorynyń negizgi jetkizýshileriniń boryshtyq mindettemeleriniń qaýipterin arttyrady. Sondaı-aq, qosyp jazý, shamadan tys dıagnostıka, memlekettik uıymdarda ambýlatorııalyq-emhanalyq kómektiń bolmaýy bazasynda zerthanalyq-dıagnostıkalyq qyzmetter kórsetýdi, arnaıy mamandardyń konsýltatsııalaryn damytýǵa degen umtylysty qıyndatady», - delingen vedomstvonyń resmı saıtynda jarııalanǵan habarlamada.

Sonymen qatar, mınıstrlikten konsýltatsııalyq-dıagnostıkalyq qyzmetterge baǵyttalǵan shyǵystar shekti bıýdjet qarajatynyń somasynan asyp ketetin de atap ótti. Sondyqtan bıyl 1 aqpanynan bastap atalǵan medıtsınalyq kómekterge bólingen qarjyǵa baqylaý engizdi. Bul óz kezeginde qajetti qyzmetti qabyldaýshylar men ony birlesip oryndaýshylar arasynda narazylyq týdyrdy. Ony sheshý úshin Densaýlyq saqtaý mınıstri Ajar Ǵınııat medıtsınalyq saqtandyrý qorynyń aýmaqtyq fılıaldary dırektorlarynyń qatysýymen birqatar kezdesýler ótkizdi.

Málim bolǵandaı, talqylaý nátıjesinde qysqa merzim ishinde myna sharalarly qabyldaý týraly sheshim maquldandy:

1. Ambýlatorııalyq deńgeıde birlesken oryndaýshylardan jelilik shkalany alyp tastaý;

2. Jumystarǵa jasalǵan monıtorıngten keıin aqpan-naýryz aılarynda konsýltatsııalyq-dıagnostıkalyq qyzmetter boıynsha oryndalǵan qyzmetterdi qosymsha qarjylandyrý;

3. Medıtsınalyq kómektiń jekelegen baǵyttary boıynsha tarıfterdi kóterý.

«Keıbir aýrýhanalardyń kredıtorlyq bereshegin eskere otyryp, qarjylyq saýyqtyrý josparlary ázirlendi. Oǵan sáıkes, jergilikti atqarýshy organdardyń bıýdjeti esebinen medıtsınalyq uıymdardyń boryshtaryn óteý boıynsha vedomstvoaralyq memorandýmdar jasaldy», - dep málim etti Densaýlyq saqtaý mınıstrliginen.

Buǵan qosa, vedomstvo bastamasymen aýyldyq jerlerdegi densaýlyq saqtaý uıymdarynda kórsetiletin qyzmetterge qoıylǵan saralanǵan koeffıtsıentterdi arttyrý josparlanyp otyr.

Eske salaıyq, búǵan deıin medıtsınalyq saqtandyrý qoryna túsetin aýdarymnyń 3% rezervke qoıylatynyn habarlap edik.