Keıbir iri salyqtar jergilikti bıýdjetke berilýi múmkin

ASTANA. QazAqparat – Elimizde jınalatyn keıbir iri salyq túrlerin jergilikti bıýdjettiń quzyretine berý jaǵy qaralyp jatyr. Bul týraly Ulttyq ekonomıka vıtse-mınıstri Azamat Amrın málim etti, dep habarlaıdy QazAqparat tilshisi.

«Qazir iri salyqtardyń bir bóligin jergilikti bıýdjetke berýdiń joldaryn pysyqtap jatyrmyz. Bizde tórt iri salyq túri bar: korporatıvtik tabys salyǵy, qosylǵan qun salyǵy, áleýmettik salyq jáne jeke tabys salyǵy. Búginde jeke tabys pen áleýmettik salyq jergilikti bıýdjetke tıesili. Memleket basshysynyń byltyr qyrkúıektegi tapsyrmasy boıynsha jergilikti bıýdjetterdiń kiris bazasyn nyǵaıtý jumysyn jalǵastyramyz», - dedi Azamat Amrın Senatta ótken dóńgelek ústel barysynda.

Vıtse-mınıstrdiń aıtýynsha, búginde keń taralǵan paıdaly qazbalardy óndirý salyǵyn da jergilikti bıýdjettiń quzyretine berý jaǵy qaralyp jatyr.

«Jalpy, salyq bazasynan jergilikti bıýdjetterge tıesili túsim – 35%, bul – 5 trln teńgeden astam. Ekinshi deńgeıdegi (oblystyq) bıýdjet boıynsha kórsetkish – 62%. Úshinshi deńgeıdegi (aýdandyq) bıýdjetter – 37%. Al, jergilikti ózin-ózi basqarý organdarynda (tórtinshi deńgeıdegi bıýdjet) – 1%. Túsken qarajatty bólýdi ákimdik pen máslıhat júzege asyrady», - deıdi ol.